«Йўқ, бу бино беш йил аввал қурилган» — АҚШ Марказий банки раҳбари Трампни «тузатди»

Федерал захира тизимининг ҳануз қурилиши давом этаётган штаб-квартирасида 24 июл куни содир бўлган ушбу мунозара АҚШ телеканалларида жонли эфирда кетган. Ҳар иккала раҳбар, президент ва FED (Федерал захира тизими раҳбари назарда тутилмоқда – таҳр.) ҳам оқ каска, қора костюмда бўлган.

Дастлаб Трамп ўз фикрини мутлақ ишонч билан билдирди, Павелл эса унга шубҳа билан қараб, қошини кўтарди. Хусусан, Трамп таъмирлаш лойиҳаси ўз бюджетидан ошиб, қиймати 3,1 миллиард доллар бўлганини айтди. Павелл эса бунга қарши чиқиб, президент бу суммага беш йил аввал таъмирланган бошқа бир бинони ҳам қўшиб юборганини айтди.

yikes -- Powell shakes his head as Trump rips into him for the cost of Fed building renovations. Powell denies some of the claims Trump is making. pic.twitter.com/Ok2aoE0JFx

— Aaron Rupar (@atrupar) July 24, 2025

AP нашри уларнинг суҳбати стенограммасини келтирди.

«Бу 3,1 миллиард доллар атрофида кўринади, бироз ошган ёки анча», деди Трамп.

Павелл бошини чайқаб, рози эмаслигини билдирди:

«Мен бундай рақамдан хабардор эмасман, жаноб президент», деб жавоб берди у.

«Бу эндигина чиқди», деди Трамп ва костюмининг чўнтагидан қоғозни олиб чиқди.

«Мен буни Федерал резервдагилардан эшитмадим», деди Павелл.

«Бу эндигина чиқди», деб яна такрорлади Трамп.

Бир неча бор сўзлар алмашилгандан кейин Павелл кўзойнагини тақиб, Трамп берган қоғоздаги рақамларга тикилди ва сўради:

«Бу биздан чиққанми?»

«Ҳа», деди Трамп.

«Сиз Мартин биноси таъмирини ҳам қўшиб юборгансизми?» деди Павелл.

«Бу учинчи бино ҳисобланади. Бу қўшимча бино».

«Бу ҳозир қурилаётган бино», деди Трамп.

«Йўқ, бу бино беш йил аввал қурилган эди», деди Павелл.

Шундан сўнг Трамп турни якунлаб, таъмирлаш тезроқ якунланишини ва Павелл фоиз ставкаларини кескин пасайтиришини исташини айтди.

Нашрнинг ёзишича, FED раҳбари ўзига нисбатан Трампнинг ижтимоий тармоқлардаги ҳақоратомуз гапларига жавоб бермаяпти. Шунингдек, Павелл президент янги бож тарифларининг инфляцияга таъсирини кузатиш учун сабр билан ҳаракат қилишини билдирмоқда.

Бу баҳс Трампнинг ойлар давомида Павеллни «фоиз ставкаларини жуда кеч тушираётган» деб танқид қилганидан кейин юз берди. У шунингдек, Павеллни лавозимдан кетишга ундаётган босим кампаниясини олиб бормоқда, деб ёзган AP нашри.

New York Times'нинг ёзишича, бу ҳайратланарли манзара бўлган.

«Жаноб Трамп одатда, дунё етакчилари унга бўйсунадиган, вазирлар эса ёқимтойлик билан илтифот кўрсатадиган муҳитга ўрганган бўлса-да, у камдан кам ҳолларда юқори лавозимли амалдор томонидан омма олдида, қолаверса, телевизион камералар қаршисида қаршиликка учрайди», деб ёзган нашр.

Ушбу очиқ қарама-қаршилик АҚШда Марказий банк — Федерал захира тизими ижро ҳокимиятидан мустақил бўлиши керак деган тамойилни яна бир бор эслатди. Павеллнинг Трампга жонли эфирда очиқ эътирози, аслида сиёсий босимларга бўйсунмаслик ва FED қарорларининг фақат иқтисодий кўрсаткичларга асосланишини ҳимоя қилишдир.

Трампнинг қимматга тушган таъмирлаш ишларини танқид қилиши – Павеллга нисбатан бошлаган босим кампаниясининг бир қисми сифатида баҳоланмоқда. Трампнинг бинони ўз кўзи билан бориб кўриш қарори эса бу босимнинг кескин кучайганидан дарак беради.