АҚШда «энг кекса бола» туғилди

АҚШ Оҳайо штатида 26 июл куни 1994 йилдан бери сақланаётган эмбриондан ривожланган чақалоқ дунёга келди. MIT Technology Review хабарига кўра, Тадеус Дэниэл Пирс «энг кекса бола» сифатида рекорд ўрнатди, чунки илгари ҳеч қачон аёллар 30 ёшли эмбрионни дунёга келтирмаган.

Она, 35 ёшли Линдси Пирс сўзларига кўра, туғруқ оғир кечган, бироқ ҳозир у ва бола ўзини яхши ҳис қилмоқда.

Линдси ва унинг эри Тим Пирс ҳозир 62 ёшда бўлган Линда Арчерднинг эмбрионини «асраб олган». Қайд қилинишича, Арчерд ёшлигида ҳомиладор бўла олмай, ЭКО амалиётига мурожаат қилган. Унинг учун тўртта эмбрион яратилган. Натижада, Арчерд қиз фарзандли бўлган. Қолган учта эмбрион музлатилиб, сақлаб қўйилган. Аммо аёл келажакда фарзандли бўлишни истамаган ва туғиш ёшидан ўтгач, эмбрионларни бошқаларга беришга қарор қилган.

АҚШда бепуштликдан азият чекаётган эр-хотинларга эмбрионни «фарзандликка олишда» ёрдам берадиган бир нечта агентликлар фаолият юритади. MIT Technology Review таъкидлаганидек, уларнинг кўпчилиги салбий оқибатлардан қўрқиб, узоқ вақт сақланган эмбрионларни қабул қилмайди. Чунки ўтган ўн йилликларда эмбрионларни сақлаш технологияси мукаммал эмас эди. Бундан ташқари, нашрнинг ёзишича, «кекса» эмбрионлар «эритилганда» бола сифатида муваффақиятли ривожланиши эҳтимоли камроқ.

«Фарзандликка олувчилар»ни танлашда биологик онанинг фикри ҳам инобатга олинади. Масалан, Линда Арчерд эмбрионни АҚШ ҳудудида яшовчи ва диндош бўлган оилага беришни истаган.