Қўшимча функционаллар
-
Тунги кўриниш
Энди Россия ўт очишни тўхтатишга кўпроқ мойил кўринмоқда – Зеленский
Украина раҳбари АҚШ президенти Доналд Трамп билан суҳбатдан кейин баёнот берди. Унинг сўзларига кўра, Россияга қилинаётган босим иш беряпти.

Фото: president.gov.ua
Украина президенти Володимир Зеленский энди Россия ўт очишни тўхтатишга кўпроқ мойил бўлиши мумкинлигини айтди. Бу ҳақда у АҚШ президенти Доналд Трамп билан кечки суҳбат якунлари бўйича қилган видеомурожаатида айтиб ўтди.
«Президент Трамп билан гаплашдим. Бу суҳбат АҚШ президенти вакили Стивен Уиткоффнинг Москвага ташрифидан сўнг бўлиб ўтди. Шерикларимиз билан умумий позициямиз мутлақо аниқ ва шаффоф - уруш тугаши керак. Урушни ростмана тугатиш керак», деди Зеленский.
Украина президентининг таъкидлашича, Москвадаги музокараларга қараганда, энди Россия ўт очишни тўхтатишга кўпроқ мойил.
«Уларга қилинаётган босим иш беряпти. Муҳими, улар бизни тафсилотларда алдамаслиги керак. Бизни ҳам, Қўшма Штатларни ҳам», деб қўшимча қилди Зеленский.
6 август куни Россия президенти Владимир Путин ва АҚШ президентининг махсус вакили Стивен Уиткофф Москвада учрашди. Россия президенти ёрдамчиси Юрий Ушаков «Украина масаласида баъзи сигналлар берилгани, тегишли сигналлар президент Трампдан ҳам олинганини» айтди. Аммо тафсилотларга тўхталмади.
АҚШ президенти Доналд Трамп ўз махсус вакили Стивен Уиткоффнинг Россия президенти Владимир Путин билан учрашувини «жуда самарали» деб атади. Унинг сўзларига кўра, учрашувда «сезиларли ютуқларга эришилди». У нимада ифодаланаётганига АҚШ президенти аниқлик киритмади.
«Шундан сўнг, баъзи европалик иттифоқчиларимизни хабардор қилдим. Ҳамма бу урушни тугатиш керак деган фикрга қўшилади ва биз яқин кунлар ва ҳафталарда бунинг устида ишлаймиз. Бу масалага эътиборингиз учун ташаккур!», деди Доналд Трамп.