Уруш нима бўляпти?

Бугун 7 август, АҚШ президенти Трамп Путин учун белгилаган муддат тугашига бир кун қолди. Дедлайн тугаши арафасида томонлар «ғимирлаб қолишди», афтидан нимадир бўладиганга ўхшайди. Қуйида шу ҳақда.

{Yii::t(}

Ўтказиб юбориш 6s

Ўтказиб юбориш

Уиткофф яна Москвада

Кеча АҚШ президентининг махсус вакили Стивен Уиткофф яна Москвага борди, олтинчи марта. Ҳозирча консерватор дўсти Такер Карлсонга интервю бериб, Путинни оғзидан бол томиб мақташга улгурмади. Учрашувда нималар дейилгани ҳам номаълум. Аниғи шуки, Америка Россияга қандайдир жиддий шарт қўя олган кўринади. Уиткоффнинг Москвага ташрифи ҳақидаги гапларга қараганда шунга ўхшаяпти. Трамп Уиткоффнинг Путин билан мулоқотидан кейин Германия канцлери Мерцга қўнғироқ қилиб, Москвадаги учрашув «кутилганидан ҳам яхши ўтганини» айтган.

Бу учрашув тугаши билан Америка нашрлари Трамп келаси ҳафта Путин билан учрашмоқчи экани, ундан кейин Зеленский билан юзма-юз кўришиши ҳақида хабарлар ёзди. Албатта, Путин билан бир ҳафта ичида учрашув ташкил қилиш осон иш эмас, лекин Вашингтон чиндан рад қилиб бўлмас шарт қўйган бўлса, буни бир кунда ҳам эплаш мумкин.

Кремл тасдиқлади

Путиннинг ёрдамчиси Юрий Ушаков Россия ва Америка президентлари ўртасида учрашув ўтказилишини тасдиқлади. Кремл мулозимига кўра, учрашув кейинги ҳафтада ўтказилади. Уиткофф Москвага ташрифи вақтида Путин, Трамп ва Зеленский ўртасида уч томонлама учрашув масаласини муҳокама қилган. Лекин руслар бу таклифга жавоб бермади. Украина президенти Зеленский ҳам «Москва ўт очишни тўхтатишга кўнганга ўхшаётгани» ҳақида гапирди.

Бу нима дегани?

Энди бу воқеалар нимани англатиши ҳақида. Ҳозирдан айтиб қўяй, Трамп белгилаган дедлайн куйиб бўлди. Эртага АҚШ белгилаган муддат тугайди, лекин катта эҳтимол Россияга қарши ҳеч қандай санкция киритилмайди. Чунки Трамп мақсадига эришди. Сизлар билан гаплашадиган гапим йўқ, дейдиган Путинни учрашишга кўндирди. Яккама-якка учрашувда эса кўп нарсага келишиш мумкин. Ва яна бир гап.

Путин Трамп билан учрашяптими, демак Уиткофф Москвада аниқ келишувга эришган. Бундай катта одамлар пишмаган келишувни муҳокама қилиш учун учрашиб ўтирмайди.

АҚШ давлат котиби Рубионинг айтишича, Уиткофф билан учрашув вақтида Россия илк марта конкрет нима истаётганини айтган. Яъни буёғига келишиш осон бўлади. Киев ҳам келишувга қаршилик қилмаса керак. Ҳозирча қандай кўринишда келишув бўлиши ноаниқ, лекин Россия ҳам чекинса керак. Чунки фақат Украина чекинадиган бўлса, бу ўртада турган Америка учун уятли бўлади.

Ўткир Жалолхонов тайёрлади.
Тасвирчи ва монтаж устаси – Бобурмирзо Анваров.