Ahmadjonov Markaziy Osiyo Futbol Assotsiatsiyasi rahbarligidan ketdi. Uning o‘rnini Tojikiston prezidentining o‘g‘li egalladi

Tojikiston poytaxti Dushanbe shahrida Markaziy Osiyo Futbol Assotsiatsiyasining navbatdagi kongressi bo‘lib o‘tdi. Qo‘shni respublika poytaxtidagi «Xayatt Ridjyensi Dushanbe» mehmonxonasining anjumanlar zalida o‘tkazilgan yig‘ilishda tashkilotga yangi rahbar saylandi.

Markaziy Osiyo Futbol Federatsiyasining yangi rahbari sifatida Tojikiston futbol federatsiyasi prezidenti Rustam Imomali saylandi. U hozirgacha tashkilot rahbarligi rolida ishlab kelgan O‘zbekiston futbol assotsiatsiyasi vitse-prezidenti Umid Ahmadjonovning o‘rnini egalladi. Shuningdek, MOFA shtab-kvartirasi Toshkentdan Dushanbega ko‘chadigan bo‘ldi. MOFAga O‘zbekiston, Tojikiston, Turkmaniston, Qirg‘iziston, Afg‘oniston va Eron futbol ittifoqlari a'zo hisoblanishadi.

Rustam Imomali 1987 yil 19 dekabrda tug‘ilgan. U Tojikiston prezidenti Imomali Rahmonning to‘ng‘ich o‘g‘li hisoblanadi. Futbolga befarq bo‘lmagan Rustam Emomali Dushanbe shahri hokimi bo‘lishi bilan birga Tojikiston futbol federatsiyasi prezidenti ham hisoblanadi. Rustam Imomali rus, ingliz va nemis tillarini bilishi aytiladi.

Qayd etish lozim, 2014 yilda tashkil qilingan Markaziy Osiyo Futbol Assotsiatsiyasini hozirgacha Mirabror Usmonov va Umid Ahmadjonov kabi o‘zbekistonlik futbol rasmiylari boshqarishgan.