O‘zgalar parvarishiga muhtoj yolg‘iz keksalarga har oylik qo‘shimcha to‘lov tayinlanadi

Vazirlar Mahkamasining “Ijtimoiy himoyaga muhtoj ayrim toifadagi shaxslar uchun nafaqalar tayinlash, to‘lash va qayta hisoblash tartibini yanada takomillashtirish hamda ushbu sohaga zamonaviy axborot texnologiyalarini keng joriy etish orqali davlat xizmati sifatini oshirishga doir qo‘shimcha chora-tadbirlar to‘g‘risida”gi qarori loyihasi e’lon qilindi.

2022 yil 1 oktyabrdan boshlab quyidagilarni nazarda tutuvchi tartiblar joriy etiladi:

• Moliya vazirligi huzuridagi Pensiya jamg‘armasi tomonidan o‘zgalar parvarishiga muhtoj bo‘lgan yolg‘iz keksalar va o‘zgalar parvarishiga muhtoj bo‘lgan nogironligi bo‘lgan shaxslarga proaktiv usul asosida har oylik qo‘shimcha to‘lovni tayinlash;
• 18 yoshgacha nogironligi bo‘lgan bolalarga va o‘zgalar parvarishiga muhtoj 18 yoshgacha nogironligi bo‘lgan bola qonuniy vakiliga proaktiv usulda nafaqalarni tayinlash.

Bunda, nafaqalar ushbu toifa shaxslar hech qanday murojaatlarisiz axborot tizimlaridan olingan ma’lumotlar asosida tayinlanadi.

Quyidagilar:

• davlat pensiyasini tayinlash uchun zarur ish stajiga ega bo‘lmagan ijtimoiy himoyaga muhtoj ayrim shaxslar toifasi, ijtimoiy himoyaga muhtoj ayrim toifa shaxslar uchun har oylik nafaqalarni olish uchun murojaat qilish tartibi, ijtimoiy himoyaga muhtoj ayrim toifa shaxslar uchun har oylik nafaqalarni tayinlash, qayta hisoblash, to‘lash va to‘lovini tiklash tartibini nazarda tutuvchi ijtimoiy himoyaga muhtoj bo‘lgan ayrim toifadagi shaxslarga nafaqa tayinlash va to‘lash tartibi to‘g‘risidagi nizom;
• ijtimoiy himoyaga muhtoj ayrim toifadagi shaxslarga nafaqa tayinlashda Davlat xizmatlari markazi yoki Yagona interaktiv davlat xizmatlari portali orqali birgina so‘rovnomani to‘ldirgan holda nafaqa tayinlashni nazarda tutuvchi ijtimoiy himoyaga muhtoj ayrim toifadagi shaxslarga nafaqa tayinlash bo‘yicha davlat xizmati ko‘rsatish ma’muriy reglamenti;
• 18 yoshgacha nogironligi bo‘lgan bola va o‘zgalar parvarishiga muhtoj 18 yoshgacha nogironligi bo‘lgan bola qonuniy vakiliga biror-bir turdagi murojaatini talab etmasdan vazirlik va idoralar axborot tizimlaridan olingan ma’lumotlarga asosan proaktiv usulda nafaqalar tayinlashni nazarda tutuvchi 18 yoshgacha nogironligi bo‘lgan bolalarga va o‘zgalar parvarishiga muhtoj 18 yoshgacha nogironligi bo‘lgan bola qonuniy vakiliga proaktiv usulda nafaqalar tayinlash bo‘yicha davlat xizmati ko‘rsatish ma’muriy reglamenti;
• o‘zgalar parvarishiga muhtoj bo‘lgan yolg‘iz keksalar va o‘zgalar parvarishiga muhtoj bo‘lgan yolg‘iz nogironligi bo‘lgan shaxslardan biror-bir turdagi murojaat talab etmasdan vazirlik va idoralar axborot tizimlaridan olingan ma’lumotlarga asosan proaktiv usulda qo‘shimcha to‘lovni tayinlashni nazarda tutuvchi o‘zgalar parvarishiga muhtoj bo‘lgan yolg‘iz keksalar va o‘zgalar parvarishiga muhtoj bo‘lgan yolg‘iz nogironligi bo‘lgan shaxslarga proaktiv usulda qo‘shimcha to‘lovni tayinlash bo‘yicha davlat xizmati ko‘rsatish ma’muriy reglamenti tasdiqlanadi va 2022 yil 1 oktyabrdan kuchga kiradi.