O‘zbekiston elchisi Litva prezidentiga ishonch yorliqlarini topshirdi

O‘zbekiston elchisi Temur Rahmonov (qarorgohi Riga shahrida) 11 fevral kuni Litva prezidenti Gitanas Nausedaga ishonch yorliqlarini topshirdi.

Foto: dunyo.info

Qayd etilishicha, rasmiy marosimdan so‘ng bo‘lib o‘tgan muloqot chog‘ida O‘zbekiston va Litva o‘rtasidagi ikki tomonlama hamkorlikning bugungi holati hamda istiqbollari muhokama qilingan.

Litva prezidenti rasmiy Vilnyus va Toshkent o‘rtasidagi siyosiy muloqot va ikki tomonlama savdo-iqtisodiy hamkorlikning rivojlanib borayotganini yuqori baholagan. 2024 yil yakuniga ko‘ra O‘zbekiston Litvaning yirik savdo-iqtisodiy sheriklaridan biriga aylangani alohida ta’kidlangan.

Prezident Gitanas Nauseda, shuningdek, Litva tomoni O‘zbekistonning YeI doirasidagi tashabbuslarini va Jahon savdo tashkilotiga kirish masalasini qo‘llab-quvvatlashini bildirgan.

Eslatib o‘tamiz, O‘zbekiston va Litva o‘rtasidagi diplomatik munosabatlar 1992 yil 5 avgustda o‘rnatilgan. Elchi Temur Rahmonov 2024 yil 17 iyun kuni Latviya prezidenti Edgars Rinkevichsga ishonch yorliqlarini topshirgan edi.

#Litva #Temur Rahmonov