Tramp: Rossiyaning Ukrainaga bergan zarbalaridan hayratdaman va hafsalam pir bo‘ldi

AQSh prezidenti Donald Tramp Rossiyaning Ukraina shaharlariga havo hujumlari mamlakatlar delegatsiyalari tinchlik muzokaralari olib borishi kerak bo‘lgan bir paytda sodir bo‘layotganidan hayratda qolganini aytdi. Bu haqda Oq uy rahbari 30 may, juma kuni Ilon Maskning Hukumat samaradorligi departamenti (DOGE) rahbari lavozimidan ketishi munosabati bilan bo‘lib o‘tgan matbuot anjumanida ma’lum qildi.

«Meni juda hayratda qoldirgan narsalarni ko‘rdim. Muzokaralar chog‘ida Kiyev kabi shaharlarga raketalar uchirildi. Muzokaralar esa, mening o‘ylashimcha, yakunlanishiga juda yaqin edi», — dedi AQSh prezidenti.

Trampning so‘zlariga ko‘ra, «biz muammoni deyarli hal qildik», biroq Rossiya Ukraina shaharlarini raketalardan nishonga olib, odamlarni o‘ldirgan. «Meni hayratga solgan narsalarni ko‘rdim. Men hayron bo‘lishni yoqtirmayman. Shuning uchun juda hafsalam pir bo‘ldi», — dedi Amerika rahbari.

Trampning so‘zlariga ko‘ra, so‘nggi haftada Rossiyaning Ukrainaga qarshi urushida kamida besh ming kishi halok bo‘lgan – «ularning aksariyati askarlar, shuningdek, butun Ukraina bo‘ylab kichik shaharchalarda yashagan odamlardir». «Men bu to‘xtaganini ko‘rishni istardim», dedi AQSh prezidenti.