San-Fransiskoda deportatsiyaga qarshi 60 nafar namoyishchi qo‘lga olindi

San-Fransiskoda AQSh Immigratsiya va bojxona nazorati (ICE) reydlari natijasida yuzaga kelgan tartibsizliklar chog‘ida 60 ga yaqin kishi, jumladan, voyaga yetmaganlar qo‘lga olindi. Bu haqda 9 iyun, dushanba kuni shahar politsiyasining (SFPD) X ijtimoiy tarmog‘idagi akkauntida ma’lum qilindi.

Hisobotda aytilishicha, 9 iyun oqshomida tinch namoyish zo‘ravonlikka aylanib, uning ishtirokchilari «hujum qilishdan tortib og‘ir vandalizm va mulkiy zararga qadar» jinoyatlar qila boshlagan. Keyin yig‘ilish noqonuniy deb topildi. «Ko‘pchilik hududni tark etgan bo‘lsa-da, bir nechasi qoldi va noqonuniy xatti-harakatlar qilishda davom etdi», deya bildirdi politsiya. Ularning so‘zlariga ko‘ra, ikki ofitser hayoti uchun xavfli bo‘lmagan tan jarohatlari olgan, ulardan biri kasalxonaga yotqizilgan.

Namoyishchilarning kichik bir guruhi tartibsizliklarni davom ettirdi va politsiyaning tarqalish buyrug‘iga bo‘ysunishdan bosh tortdi. Keyin 60 ga yaqin odam qo‘lga olingan. «Odamlar har doim o‘zlarining Birinchi tuzatishga kiritilgan huquqlaridan foydalanish huquqiga ega (u so‘z, matbuot va yig‘ilishlar erkinligi huquqini e’lon qiladi), lekin zo‘ravonlik, ayniqsa San-Fransisko politsiyachilariga nisbatan hech qachon qabul qilinmaydi», — deya xulosa qildi politsiya.

AQSh federal hukumati antimigratsion reydlarga qarshi norozilik namoyishlari fonida Los-Anjyelesda joylashtirilgan milliy gvardiyachilar sonini ikki barobarga, ya’ni 4000 kishiga yetkazishga qaror qildi. Bu haqda Kaliforniya gubernatori Gevin Nyusom ma’lum qildi.

Milliy gvardiyaning yangi bo‘linmalaridan tashqari Kaliforniyadagi "Kemp-Pendlton" bazasidan 700 nafar dengiz piyoda askarlari ham Los-Anjyelesga yuboriladi. AQSh prezidenti ma’muriyati bu qarorni «federal xodimlar va binolarga nisbatan tahdidlarning kuchayishi» bilan izohladi, deb yozadi AFP.