Isroil butun dunyodagi elchixonalari va konsulliklarini yopdi

Isroilning 13 iyun, jumaga o‘tar kechasi Eronga bergan yirik zarbalaridan so‘ng butun dunyo bo‘ylab Isroil elchixonalari va konsulliklari yopiqligicha qolmoqda. «So‘nggi voqealarni hisobga olgan holda, Isroilning butun dunyo bo‘ylab vakolatxonalari yopiqligicha qolmoqda, konsullik xizmatlari ko‘rsatilmayapti», — deya xabar beradi Isroil diplomatik vakolatxonalari veb-saytlari.

Xuddi shunday xabarlar Isroilning AQSh, Buyuk Britaniya, Shvetsiya, Norvegiya, Fransiya, Nigeriya, Rossiya va Ukrainadagi elchixonalari veb-saytlarida ham joylashtirilgan.

Avvalroq Isroil Erondagi qator nishonlarga, jumladan, Tehrondagi obektlarga va Natanz yadro markaziga kuchli zarbalar bergan edi. Eron matbuotiga ko‘ra, hujumlarda, jumladan, Eron qurolli kuchlari bosh shtabi boshlig‘i Muhammad Bag‘iriy va Islom inqilobi muhofizlari korpusi qo‘mondoni Husayn Salamiy ham halok bo‘lgan.

Tehron Isroilning zarbalarini «urush e’lon qilish» deb atadi. Eron oliy rahbari oyatulloh Ali Xomanaiy Isroilga dahshatli oqibatlar bilan tahdid qildi. Prezident Ma’sud Pezeshkiyon Tehron Isroilni hujumdan pushaymon qildirishini aytdi. Isroil armiyasi ma’lumotlariga ko‘ra, Eron 13 iyun, juma kuni Isroilga qarshi kamida 100 ta uchuvchisiz uchuvchisiz uchoq uchirdi, ularning aksariyati Isroil havo hujumidan mudofaa kuchlari tomonidan tutib olingan.

Xalqaro hamjamiyat vaziyatni yumshatish va vazminlikka chaqirar ekan, Isroil bosh vaziri Binyamin Netanyahu harbiy amaliyot «ko‘p kun davom etishini» aytdi.