Eron AQShga yana bir bor tahdid qildi

Tehron AQSh Isroil va Eron o‘rtasidagi harbiy mojaroga kirganidan keyin yana bir bor unga tahdid qildi. «Islom jangchilari kuchli va maqsadli amaliyotlar orqali siz uchun jiddiy, oldindan aytib bo‘lmaydigan oqibatlarni keltiradi», dedi Eron Qurolli kuchlari vakili Ibrohim Zolfag‘ariy 23 iyun, dushanba kuni Eron davlat televideniyesi orqali. Uning so‘zlariga ko‘ra, AQShning harbiy mojaroga kirishi Eron armiyasining mintaqadagi urush yo‘lidagi «qonuniy nishonlari doirasini kengaytiradi».

Shu kuni Isroil mudofaa kuchlari (TSAHAL) Erondan yangi raketa hujumlari haqida xabar berdi. Havo hujumidan mudofaa tizimlari tahdidni qaytarmoqda, deyiladi bayonotda. Raketa tahdidi Isroil shimolidagi bir qancha hududlarda, keyin esa mamlakatning markaziy qismida, jumladan Tel-Aviv va Quddusda e’lon qilindi. AFP muxbirining xabar berishicha, Quddusda bir necha portlash ovozlari eshitilgan. Isroil matbuoti Eron 15 ga yaqin raketa otganini yozmoqda. Islom inqilobi muhofizlari korpusi (IIMK)ga yaqin bo‘lgan "Tasnim" axborot agentligi Isroilga uchuvchisiz uchoqlardan ikki marta hujum uyushtirilgani haqida xabar berdi.

O‘z navbatida Isroil yana Eronga zarba berdi. Isroil harbiy-havo kuchlari Eron g‘arbidagi Kirmonshohdagi harbiy infratuzilmaga hujum qildi, dedi TSAHAL vakili. Uning so‘zlariga ko‘ra, zarbalarda 15 ta qiruvchi samolyot ishtirok etgan, uchirish maydonchalari va «yer-yer» sinfidagi raketalarni saqlash joylari nishon bo‘lgan.

Bundan tashqari, Isroil armiyasi Erondagi oltita aerodromga hujum qilib, uchish-qo‘nish yo‘laklarini vayron etdi, 15 ta harbiy samolyot va vertolyotni yo‘q qildi. Shunday qilib, Isroil harbiylari Eron havo hududi ustidan nazoratni kengaytirishga intilmoqda. Isroil armiyasi «Eron rejimining harbiy salohiyatini zaiflashtirishga qaratilgan sa’y-harakatlarni davom ettirmoqda», deya qo‘shimcha qildi TSAHAL.

22 iyunga o‘tar kechasi Qo‘shma Shtatlar Isroil va Eron o‘rtasidagi 13 iyunda boshlangan harbiy mojaroga aralashdi. Amerika armiyasi Eron yadro dasturining uchta obektiga zarba berdi. B-2 bombardimonchi samolyotlari Fordo zavodiga o‘n ikkita 13,6 tonnalik bunkerga qarshi bomba bilan hujum qildi va yana ikkita bunday bomba Natanzga tashlandi. Suvosti kemalari Natanz va Isfahondagi obektlarga 30 ta «Tomagavk» raketasini uchirdi.

AQSh prezidenti Donald Tramp xalqqa murojaatida Eronning uran boyitish bo‘yicha asosiy inshootlari yo‘q qilinganini aytdi. U Eronni «Yaqin Sharqdagi zolim» deb atadi va «so‘nggi sakkiz kun ichida ko‘rganimizdan ham kattaroq tinchlik yoki fojia»ga duch kelishi haqida ogohlantirdi. Eron oliy rahbari Ali Xominaiyning maslahatchisi AQSh harbiy bazalarini Eron hujumlari uchun «qonuniy nishon» deb atadi.