Manama va Toshkent o‘rtasida havo qatnovi yo‘lga qo‘yilishi mumkin

Mamlakat elchixonasi (qarorgohi Ar-Riyoz shahrida joylashgan) ko‘magida tashkil etilgan mazkur tadbir O‘zbekistonning sayyohlik salohiyatini arab mamlakatlarida targ‘ib qilish va turizm sohasidagi ikki tomonlama hamkorlikni kengaytirish uchun samarali maydon vazifasini o‘tadi.

Forumda ikki mamlakatning vazirlik va idoralari, sayyohlik kompaniyalari, aviatashuvchilar, savdo-sanoat palatalari hamda ishbilarmon doiralari vakillari ishtirok etdi. 

Forum doirasida "O‘zbekiston - Ipak yo‘li durdonasi" taqdimoti o‘tkazildi. Unda tarixiy-madaniy meros, sayyohlik yo‘nalishlari, shuningdek, ziyorat, tibbiyot, gastronomiya va ekologik turizm sohalaridagi yangi imkoniyatlar keng ko‘lamda namoyish etildi. 

O‘zbekistondagi YuNeSKO Umumjahon merosi obektlari va infratuzilmani rivojlantirishga alohida e’tibor qaratildi.

Tashrif davomida O‘zbekiston delegatsiyasi a’zolari Bahrayn turizm vaziri Fatima Al-Sayrafiy bilan alohida uchrashuv o‘tkazdi. Uchrashuv davomida tomonlar sayyohlik sohasidagi ikki tomonlama hamkorlikning joriy holati va istiqbollarini muhokama qildilar. Sayyohlar almashinuvini oshirish, viza tartiblarini soddalashtirish, Manama va Toshkent o‘rtasida havo qatnovini yo‘lga qo‘yish, shuningdek, ikki mamlakatning sayyohlik brendlarini targ‘ib qilishga qaratilgan qo‘shma tadbirlarni uyushtirish masalalariga alohida e’tibor qaratildi.

Bahrayn tomoni O‘zbekistondagi mashhur islom allomalari va arboblari bilan bog‘liq muqaddas qadamjolar hamda tarixiy obidalarga yuqori darajada qiziqish bildirdi. Shu munosabat bilan, ziyorat turizmini rivojlantirishga va "Tabarruk ziyorat" platformasini Bahrayn sayyohlari va turoperatorlari orasida targ‘ib etish masalalariga alohida urg‘u berildi.