Microsoft 8999 долларлик планшетнинг янги версиясини тақдим этди

Microsoft компанияси ўзининг деворга осиладиган компьютери иккинчи авлоди - Surface Hub’ни тақдим этди. У корпоратив фойдаланишга мўлжалланган.

2016 йилда чиқарилган компьютернинг биринчи авлоди диагонали 55 ва 84 дюйм, тиниқлиги 1080р билан тақдим этилган бўлса, Surface Hub 2 эса 50,5 дюймли форм-факторда, томонлар нисбати 3:2 ҳамда 4K+ тиниқликда таклиф этилади. Дисплей энди ҳам горизонтал, ҳам вертикаль позицияда бўлиши мумкин. Узоқдан овозни қабул қилувчи микрофонлар, айлантирилувчи 4K-камера, динамиклар ва бармоқ излари сканери ҳам назарда тутилган. Буларнинг бари Windows 10’да ишлайди.

Ишлаб чиқарувчи Surface Hub 2 ҳақида батафсил маълумотларни ҳозирча ошкор қилмади. Microsoft тахминий нархни ҳам билдирмади, бироқ таъкидланишича, сотувлар 2019 йилда бошланиши режалаштирилган. Surface Hub’нинг биринчи авлоди 8999 доллар турган.