Vertu 500 минг долларлик кнопкали телефонни сотувга чиқарди

Vertu (Англия) расмий веб-сайтида яна бир янги маҳсулот пайдо бўлди — Signature V Cobra Limited Edition тугмачали телефони. Функционаллик жиҳатдан телефон жуда оддий: унда фақат қўнғироқларни амалга ошириш ва SMS ёзиш мумкин. Буни 2 дюймли дисплейга эга кичик қурилманинг кўриниши яққол тасдиқлайди. Аммо у техник хусусиятлари эмас, балки дизайни билан эътиборни тортади.

Телефон дизайни Франциянинг Frederic Boucheron қироллик заргарлик уйи билан биргаликда яратилди. Асосий безак сифатида қадимги Миср мифологиясида куч ва донолик рамзи бўлган кобра танланди. У 439 та пушти ёқутдан ясалган, судралувчининг кўзлари ўрнига иккита яшил зумрад қадалган. Шунингдек, илон боши ёнида 2,02 каратли нок шаклидаги олмос, танасида эса 1,02 каратли олмос бор.

Гаджет клавиатураси яхлит ёқутдан ясалган, ташқи томони эса қимматбаҳо тошлар билан қопланган. Таъкидланишича, бу иш учун дизайнерларга 4 йил керак бўлди. Қурилманинг орқа томонида Vertu логотипи ва Frederic Boucheron белгиси бўлган заргарлик бир нечта винтлар ва олтин қопламали металл иловани кўриш мумкин. Телефонда камера йўқ.

Vertu Signature V Cobra Limited Edition компаниянинг расмий веб-сайтида 504 308 доллар нархда сотилмоқда.