«У буткул ақлдан озган». Трамп Путинни танқид қилди

Россия қуролли кучлари бир неча кундан буён кетма-кет Киев ва бошқа Украина шаҳарлари устига дронлар ва ракеталар билан ҳужум уюштирмоқда. АҚШ президенти Доналд Трамп бу ҳужумлар борасида тўхталиб, сабр-тоқатини йўқотаётганини ёзди ва Россия президенти Владимир Путинни «телба» деб атади.

«Мен ҳар доим Россия президенти Владимир Путин билан жуда яхши муносабатда бўлганман, аммо у билан нимадир содир бўлди. У мутлақо ТEЛБА бўлиб қолди! У беҳудага кўп одамларни ўлдиряпти — бу ерда гап фақат аскарлар ҳақида эмас. Ҳеч қандай сабаб бўлмасдан Украина шаҳарлари устига ракеталар ва дронлар учирилмоқда», – деб ёзди Трамп Truth Social ижтимоий тармоғида.

АҚШ президенти Путин бутун Украинани босиб олмоқчи эканини, бироқ агар у буни амалга оширса, бу Россиянинг қулашига олиб келишини қўшимча қилган.

Трамп, шунингдек, Украина президенти Володимир Зеленский ҳам ўз мамлакатига фойда келтирмайдиган тарзда гапираётгани ва у буни тўхтатиши кераклигини айтган:

«Худди шунингдек, президент Зеленский ҳам ўз мамлакатига фойда келтирмайдиган тарзда гапиряпти. Оғзидан чиққан ҳар бир сўз муаммо туғдирмоқда. Бу менга ёқмайди ва бу дарҳол тўхташи керак.

Агар мен президент бўлганимда, бу уруш ҳеч қачон бошланмас эди. Бу – Зеленскийнинг, Путиннинг ва Байденнинг уруши, «Трампники» эмас. Мен фақат жуда йирик ва жирканч ёнғинларни ўчиришга ҳаракат қиляпман – булар мутлақо лоқайдлик ва нафрат туфайли бошланган».

Зеленский якшанба куни Россиянинг янги ҳужумлари фонида АҚШ ва бошқа давлатларнинг «сукут сақлаётганини» танқид қилган эди.

Россия ҳарбийлари 25 майга ўтар кечаси Украина бўйлаб баллистик ракеталар ва дронлар қўллаган ҳолда ёпирилма ҳужум амалга оширган эди. Украина томони ушбу ҳужумни энг йирик ҳаво ҳужумларидан бири деб атади. Унда 300 га яқин дрон ва 70 та ракета қўлланган.

Зарбалар оқибатида мамлакат бўйлаб камида 12 киши ҳалок бўлиб, 60 дан ортиқ киши яраланган. Украина фавқулодда вазиятлар давлат хизматига кўра, 13 регион зарбалар остида қолган.

Шунингдек, Трамп Ню Жерси штатида самолёт бортига чиқиш арафасида журналистлар билан суҳбатлашди:

«Мен Путин ҳужумларни кучайтираётганидан хурсанд эмасман, айниқса, урушни тугатиш бўйича сулҳ музокаралари олиб борилаётган бир пайтда. У кўплаб одамларни ўлдиряпти ва мен Путинга нима бўлганини тушунмаяпман. Мен уни анчадан бери танийман. Ҳар доим яхши тил топишганмиз. Лекин у шаҳарларга ракета отмоқда ва одамларни ўлдиряпти – бу менга умуман ёқмаяпти. Биз айни пайтда музокара ўртасидамиз, у эса Киев ва бошқа шаҳарларга ракета отмоқда», – дея Трампнинг сўзларини келтирмоқда New York Times.

Трамп орадан бир неча соат ўтиб, юқоридаги постини ёзиб, Путин ҳақида кескин фикр билдирган.

Трамп бунгача Россияни қўллаб-қувватлагандек кўринган бўлса-да, бу сафар ҳужумлар кучайганидан «ҳайратда» эканини билдирди.