“Виза беришни осонлаштириш ҳақида гап-сўз йўқ” – АҚШ элчихонаси

АҚШ элчихонаси вакилининг Kun.uzʼга маълум қилишича, ўзбекистонликларга виза бериш сиёсатида эълон қилишга арзигулик ҳеч қандай ўзгариш йўқ. Виза олишни осонлаштириш мавзуси муҳокама қилинмаган. Лекин Ўзбекистоннинг таклифларини интиқлик билан кутамиз, дейди элчихона.

{Yii::t(}

Ўтказиб юбориш 6s

Ўтказиб юбориш

Ўтган ҳафта Ўзбекистон Ташқи ишлар вазирлигига АҚШ фуқаролари учун 30 кунлик визасиз режимни жорий қилиш, ўзбек фуқаролари учун эса АҚШ визасини олишни енгиллаштириш бўйича музокаралар ўтказиш топшириғи берилди. ТИВ 3 ой ичида ушбу масала юзасидан якуний таклифларини тақдим этиши керак.

Kun.uz АҚШнинг Ўзбекистондаги элчихонасига уланиб, бу борада қандай янгиликлар борлиги ҳақида сўради. Элчихонанинг Жамоатчилик билан алоқалар департаментига кўра, айни пайтда Ўзбекистон фуқароларига АҚШ визасини бериш бўйича ҳеч қандай янгилик йўқ.

“Яқинда президент Мирзиёев ҳукуматга АҚШ визасини олишни енгиллаштириш бўйича топшириқ берганидан хабардормиз. Лекин виза сиёсатида эълон қилишга арзигулик ҳеч қандай янгилик йўқ. Қонун-қоидалар ўша-ўша, ҳеч нима ўзгармаган. Муҳокамалар ҳали бошланмаган, биз Ўзбекистон таклифларини интиқлик билан кутамиз” – АҚШнинг Ўзбекистондаги элчихонаси

Элчихонанинг қўшимча қилишича, Ўзбекистон ҳукуматининг АҚШ фуқаролари учун 30 кунлик визасиз режимни ўрнатишга қилаётган ҳаракати америкалик тадбиркорлар келишини кўпайтиради.

“Кўп йиллар давомида АҚШ Ўзбекистон билан иқтисодий алоқаларни мустаҳкамлаш йўлларини муҳокама қилиб келади. Ўзбекистон виза режимига киритаётган ўзгартиришлар ушбу мунозараларнинг муҳим элементи бўлди. Чунки Ўзбекистоннинг визасиз режими АҚШ компаниялари вакилларининг бу ерда бизнес юритишини сезиларли даражада осонлаштиради” – АҚШнинг Ўзбекистондаги элчихонаси

Эслатиб ўтамиз, яқинда АҚШнинг Ўзбекистондаги элчиси Жонатан Ҳеник ОАВ вакиллари билан мулоқотда консуллик Ўзбекистон фуқароларидан максимал кўп миқдорда виза сўрови олаётгани, максимал миқдорда виза бераётганини айтганди. Ўзбекистоннинг иқтисодий тараққиёти тезлашиб, бой мамлакатга айлангани сари виза олиш ҳам осонлашади, деган элчи.