Хитойда роботлар илк бор рингда бир-бири билан олишди

Хитойда ҳуманоид роботлари ўртасида дунёдаги биринчи жанг бўлиб ўтди. ММА услубидаги жанг 25 май куни CMG World Robot Competition доирасида ташкил этилди.

Рингга 2024 йил май ойида тақдим этилган G1 роботлари кўтарилди. Улар — бўйи 1,32 метрни ташкил этадиган ихчам модел ҳисобланади. Ушбу моделлар ўлчами жиҳатидан 1,8 метрли H1 моделидан кичикроқ, аммо яхши манёврчанликка эга, тезлиги сониясига 2 метргача етади.

Жанг вақтида роботлар масофадан бошқарув пултлари ёрдамида тўртта операторлар жамоаси томонидан бошқариб турилган.

Синов вақтида одамсимон роботларнинг югуриш, юриш, рақсга тушиш, йиқилиш, чидамлилик ва назорат каби кўникмалари текширилган. Энг муҳим жиҳати йиқилганидан кейин қайта тура олиш қобилияти бўлди — бунга 8 сония талаб этилди. Таъкидланишича, бу жанговар роботлар самарадорлигини баҳолашда, уларнинг аппарат ва дастурий таъминоти бир-бирига мос келишини аниқлашда муҳим аҳамиятга эга.

Оптималлаштирилган сунъий интеллект алгоритмларига эга замонавий роботлар ҳаракатга миллисониялар ичида жавоб беради. Улар мувозанат ва барқарорликни сақлаган ҳолда, бир зумда барча «бўғим»лар двигателларини ишга тушира олади.

Эслатиб ўтамиз, апрел охирларида Пекинда ўтказилган ярим марафонда тарихда биринчи марта одамлар одамсимон роботлар билан рақобатлашган эди. Ярим марафонда 12 минг спортчи ва 20 та одамсимон робот иштирок этган. Роботлардан биринчи бўлиб марра чизиғига етиб келгани бунга 2 соат-у 40 дақиқа сарфлаганди, бу энг тез келган одамнинг натижасидан 2,5 баробарга секин.