Трамп Путиндан норози: нима гап ўзи?

АҚШ президенти Доналд Трамп Россия армияси Киевни навбатдаги марта бомбалаганига кескин муносабат билдирди. Трампнинг айтишича, у доим Путин билан яхши келишган, лекин охирги вақтларда «Россия президентига нимадир бўлган». Қуйида шу ҳақда.

{Yii::t(}

Ўтказиб юбориш 6s

Ўтказиб юбориш

Навбатдаги ёппа ҳужумдан кейин

24 майга ўтар кечаси Россия армияси Украина шаҳарларига серияли комбинацион зарбалар йўллади. Бу ҳужумлар учун зарбдор дронлар ва баллистик ракеталардан фойдаланилди. Россияда ишлаб чиқарилаётган Эрон дронлари россиялик инженерлар томонидан анча мукаммаллаштирилгани маълум бўлди. Украин ҳарбийларига кўра, эндиликда руслар учираётган камикадзе дронларни сунъий интеллект бошқармоқда ва улар ортиқ GPS хизматидан фойдаланмаяпти. Бу дронларнинг чап бериш имкониятини оширади. Дронлар қайта дастурлангани уларни тутишни ҳам қийинлаштирган.

Охирги ҳужум уруш бошидан буён Киевга берилган энг жиддий зарбалардан бири бўлди. Бу ҳужум Россия ва Украина урушни тугатиш бўйича тўғридан-тўғри музокара бошлагани фонида амалга оширилди. Шу кунларда Россия ва Украина ўша музокараларда келишилган 1000 га 1000 кўринишида асирлар алмашинувини амалга оширганди.

Трамп: «Путин бутунлай ақлдан озди»

АҚШ президенти Трамп Россиянинг Украина бўйлаб навбатдаги зарбаларини қоралади. «Россиялик Путин билан доим яхши муносабатда бўлганман. Лекин унга нимадир бўлди. У буткул АҚЛДАН ОЗДИ. У билиб туриб кўп одамларни ўлдирмоқда ва мен фақат аскарлар ҳақида гапирмаяпман. Украина шаҳарларига ҳеч қандай сабабсиз ракета ва дронлар учириляпти.

Доим айтганман, унга БУТУН Украина керак, бир қисми эмас. Балки шундай бўлар ҳам, лекин Путин шу ишни қилса, бу Россия қулаши билан якунланади», деди Трамп.

АҚШ президенти бу постида Украина президенти Зеленскийни ҳам танқид қилди, шунингдек, навбатдаги марта уруш бошланишида Зеленский, Байден ва Путинни айблади. «Президент Зеленский ҳам айтаётган гаплари билан давлатига ёрдам бераётгани йўқ. У гапираётган гаплар муаммо туғдирмоқда ва бу менга ёқмаяпти. Мен президент бўлсам, бу уруш асло бошланмасди. Бу Зеленский, Путин ва Байденнинг уруши, Трампники эмас. Мен шунчаки уқувсизлик ва нафрат ортидан келиб чиққан ёнғинни ўчирмоқчи бўляпман», деб ёзди Трамп ўзига тегишли Truth ижтимоий тармоғидаги саҳифасида.

Аввалроқ Трамп журналистлар билан суҳбат чоғида Россияга қарши кескин санкциялар жорий қилиш ҳақида жиддий ўйлаётганини айтганди.

Маълумот учун, 16 май куни Владимир Путиннинг таклифи билан Укриана ва Россия уч йил ичида илк марта Истанбулда тўғридан-тўғри музокара бошлаганди. Лекин Путин ўзи таклиф қилган музокарага бормади, музокарада фақат асирлар алмашиш бўйича келишувга эришилди. Ҳозирча бу музокаралар давом этиш-этмаслиги аниқ эмас. Украина томони музокараларнинг ҳар қандай форматига тайёрлигини айтаётган бўлса, Россия ўт очишни тўхтатишни рад этмоқда. Шунингдек, Москва Киевнинг Зеленский ва Путин ўртасида яккама-якка учрашуви таклифига ҳам кўнмаяпти.

Ўткир Жалолхонов тайёрлади
Тасвирчи ва монтаж устаси – Фахриддин Ҳотамов