Трамп Лос-Анжелесга Миллий гвардия аскарларини юбормоқда

АҚШ президенти Доналд Трамп маъмурияти ноқонуний мигрантларга қарши рейд туфайли намойишчилар билан тўқнашувлар бўлиб ўтган Лос-Анжелес шаҳрида Миллий гвардиянинг 2 минг нафар ҳарбий хизматчиси сафарбар этилганини маълум қилди. Пентагон раҳбари армия кучлари ишга солиниши эҳтимолини истисно қилмаган. Калифорния губернатори ва мамлакатдаги энг йирик иккинчи шаҳар мэри Оқ уйни иғвогарлик ва қўрқув уйғотишга уринишда айблади.

АҚШ мудофаа вазири Пит Ҳегсет «агар зўравонлик давом этса», Пентагон Лос-Анжелесга армия бўлинмаларини юборишга тайёрлиги ҳақида огоҳлантирди. «Қўшни Кэмп-Пендлтондаги денгиз пиёдалари юқори шайлик ҳолатида», дея унинг сўзларини келтирган Reuters агентлиги.

Шанба куни АҚШ Иммиграция ва божхона полицияси (ICE) федерал агентлари кетма-кет иккинчи кун Лос-Анжелеснинг жануби-шарқидаги Парамоунт туманида намойишчилар билан тўқнашди, у ерда баъзи намойишчилар Мексика байроқларини кўтарган. Шанба куни кечқурун Лос-Анжелес марказидаги яна бир норозилик намойишида 60 га яқин одам тўпланди, улар «ICE, Лос-Анжелесдан чиқиб кет!» қабилидаги шиорларни айтишган.

Парамоунт аҳолисининг 80 фоиздан ортиғини испанлар ташкил қилади. Одамларни тарқатиш учун кўздан ёш оқизувчи газ ва шовқинли гранаталар қўлланган.

Трамп «ўрнашиб олган қонунсизликни бартараф этиш» учун Миллий гвардия қўшинларини жойлаштириш тўғрисидаги президент меморандумини имзолади, дейилади Оқ уй баёнотида.

Оқ уй хабарига кўра, 2 минг нафар миллий гвардиячи жўнатишга тайёрланмоқда. ICE директори Том Ҳоман («чегара қироли») Fox News телеканалига Миллий гвардия зудлик билан Лос-Анжелесда жойлаштирилишини айтди.

Калифорния губернатори Гэвин Нюсом бу қарорни «қасддан иғвогарлик» деб атади. У куч ишлатмасликка чақирган.

«Федерал ҳукумат Лос-Анжелесга Миллий гвардиянинг 2000 аскарини жойлаштирмоқда – ҳуқуқ-тартибот органлари ходимлари етишмаганидан эмас, балки улар томоша хоҳлагани учун», – дея ёзган губернатор X ижтимоий тармоғидаги саҳифасида.

«Уларга томоша кўрсатманг. Ҳеч қачон зўравонлик қилманг. Тинчлик билан гапиринг», – дея мурожаат қилди у намойишчиларга. Губернатор Миллий гвардиянинг иштироки «фақат кескинликни кучайтириши»дан хавотирда.

Нюсом, шунингдек, Пентагон раҳбарининг тартибсизликларни бостириш учун армия жалб қилиниши мумкинлиги ҳақидаги баёнотини «нормал бўлмаган хатти-ҳаракат» деб атади, деб таъкидлайди Reuters. Унинг сўзларига кўра, «Америка тупроғида ўз фуқароларига қарши денгиз пиёдаларини жойлаштириш билан таҳдид қилиш»га йўл қўйиб бўлмайди.

Трамп ўзининг Truth Social ижтимоий тармоғида агар Калифорния губернатори ва Лос-Анжелес мэри Карен Басс ўз ишини уддалай олмаса, унда «федерал ҳукумат аралашиши ҳамда ТАРТИБСИЗЛИК ва ТАЛОН-ТОРОЖ ҳолатлари муаммосини ҳал қилиши»ни билдирган.

АҚШ президенти Миллий гвардияни муайян мақсадлар, жумладан, «исёнларни бостириш» учун юбориш ваколатига эга.

Лос-Анжелес мэри аввалроқ ICE’ни АҚШнинг иккинчи йирик шаҳрини «қўрқувга солиш»га уринишда айблаганди.

Аҳолини рўйхатга олиш маълумотлари шуни кўрсатадики, Лос-Анжелес аҳолисининг катта қисми испан тилида сўзлашувчилар ва чет элда туғилганлардир, Трамп эса ноқонуний муҳожирларга қарши курашни иккинчи президентлик муддатининг устувор йўналишларидан бирига айлантирди.

«Хориж давлати байроқларини кўтарган исёнчилар иммиграция хизмати ходимларига ҳужум қилмоқда, Америка сиёсий раҳбариятининг ярми эса чегара назорати ёвузлик деган қарорга келди», - дея Трампнинг танқидчиларини қоралади АҚШ вице-президенти Жей Ди Вэнс Х ижтимоий тармоғида.

Иммиграция масаласида қаттиққўллик тарафдори бўлган Оқ уй расмийси Стивен Миллер норозилик намойишларини «зўравонлик исёни» деб атади.

Маъмурият 1807 йилги қўзғолонларни ҳарбийлар томонидан бостириш тўғрисидаги қонун нормаларини қўлламаган, деб хабар берди Reuters манбалари. Ушбу қонун президентга АҚШ армиясини қонунга риоя этилишини таъминлаш ва тартибсизликларни бостириш учун жалб қилиш ваколатини беради. У охирги марта 1992 йилда Калифорния губернатори илтимосига биноан Лос-Анжелесдаги тартибсизликлар пайтида қўлланган.