АҚШ Конгрессида Трампнинг рафиқаси визаси билан боғлиқ можаро юзага келди

Биринчи хоним Мелания Трампнинг иммиграция тарихи шу ҳафта АҚШ Конгрессида қизғин мунозаралар марказида бўлди. Вакиллар палатасининг судялар қўмитасидаги тингловда демократ конгрессмен Жасмин Крокетт президентнинг рафиқаси 2001 йилда олган EB-1 визаси қонунийлигига очиқчасига шубҳа билдирди, деб ёзди Newsweek.

«Эйнштейн визаси» сифатида танилган EB-1 одатда «муҳим ютуқлар» ва «барқарор халқаро эътирофга» эга бўлган одамларга берилади - Нобел мукофоти лауреатлари, Олимпия олтин медали совриндорлари, таниқли олимлар ёки санъаткорларга.

«Охирги марта текширганимда, биринчи хонимда бундай мукофотларнинг ҳеч бири йўқ эди», деди Крокетт. «Мелания - модел, лекин Тайри Бэнкс ёки Синди Кроуфорд даражасида эмас. Шунга қарамай, у одатда ажойиб истеъдодлар учун ажратиладиган визани олди».

Конгрессмен республикачиларни икки томонлама стандартда айблаб, улар оддий мигрантларни нишонга олишга дарҳол тайёр эканини, шу билан бирга Трампга яқин одамларнинг шубҳали ҳолатларига кўз юмаётганини айтди.

«Ҳалоллик - қонуний мигрантларни кўчадан ушлаб, беном фургонларга тиқиш эмас», деди у. «Ҳалоллик – шунингдек, президентнинг рафиқаси Қўшма Штатларга қандай келиб қолганини қайта кўриб чиқиш».

Жасмин Крокетт ўз нутқини киноя билан якунлади: «Бу ерда математика қўл келмаётганини тушуниш учун Эйнштейн бўлиш шарт эмас».

Очиқ манбаларга кўра, Мелания Трамп (Мелания Кнавс) 1990-йилларнинг ўрталарида Словениядан Қўшма Штатларга моделлар учун мўлжалланган ишчи визаси билан келган.

1996 йил - Мелания биринчи марта H-1B ишчи визаси билан келган.

2001 йил - санъат, фан, таълим, бизнес ёки спортда «алоҳида иқтидорга» эга бўлган шахсларга бериладиган «Эйнштейн визаси»ни (EB-1) олган.

2006 йил - 2005 йилда Доналд Трампга турмушга чиққанидан кейин АҚШ фуқароси бўлган.

У олган EB-1 визаси юқори талаблари туфайли баҳс-мунозараларга сабаб бўлди - одатда у нуфузли мукофотлар эгалари ёки халқаро миқёсда тан олинган мутахассисларга берилади.