Mers: Ukraina uchun qurol masofasiga endi hech qanday cheklov yo‘q

Berlin, London, Parij va Vashington endi Kiyevga yetkazib beriladigan qurol-yarog‘ turlari masofasini cheklamaydi, deya ma’lum qildi Germaniya kansleri Fridrix Mers. U buni Ukraina uchun hal qiluvchi omil deb atadi.

Foto: Michael Kappeler/dpa/picture-alliance

Germaniya, Buyuk Britaniya, Fransiya va Qo‘shma Shtatlar Ukrainaga yetkazib beriladigan qurol-yarog‘lar masofasiga qo‘yilgan cheklovlarni bekor qildi, dedi Germaniya kansleri Fridrix Mers 26 may, dushanba kuni. "Endi Ukrainaga yetkazib beriladigan qurol-yarog‘lar masofasida hech qanday cheklov yo‘q – na inglizlarda, na fransuzlarda, na bizda. Hech qanday cheklov yo‘q".

Mersning so‘zlariga ko‘ra, bu Ukraina endi, jumladan, Rossiya hududidagi harbiy nishonlarga zarba berish orqali ham o‘zini himoya qila oladi degani. «Yaqin vaqtgacha, juda kam istisnolardan tashqari, u buni qila olmagandi. Endi qila oladi», dedi Germaniya hukumati rahbari va bu Ukrainaning urushni sifatli olib borishi uchun «hal qiluvchi ahamiyatga ega» ekanligini ta’kidladi.

Mers Germaniya Ukrainani qo‘llab-quvvatlashda davom etish uchun «qo‘lidan kelgan barcha ishni qilishini» tasdiqladi. Shuning uchun, dedi kansler, u yaqinda Kiyevga Buyuk Britaniya bosh vaziri Kir Starmer, Fransiya prezidenti Emmanuel Makron va Polsha bosh vaziri Donald Tusk bilan «ko‘ngillilar koalitsiyasi» tarkibida tashrif buyurgan.

#Ukraina #Fridrix Mers