«Afrosiyob» tezyurar poyezdining manyovr lokomotivida yong‘in chiqdi

«O‘zbekiston temiryo‘llari» AJ «Afrosiyob» tezyurar poyezdining manyovr lokomotivida kuzatilgan yong‘in yuzasidan ma’lumot berdi.

Ijtimoiy tarmoqlarda «Afrosiyob» tezyurar elektropoyezdida sodir bo‘lgan yong‘in aks etgan video tarqaldi.

Qayd etilishicha, yong‘in faqat poyezdni tashish bo‘yicha yordamchi ishlarni bajaruvchi manyovr lokomotiviga ta’sir qilgan. «Afrosiyob» poyezdi yong‘inga uchramagan va ertaga jo‘nab ketadi.

Yonayotgan teplovoz ichida yo‘lovchilar borligi haqidagi da’volar noto‘g‘ri. Hodisa muntazam reysdan tashqarida sodir bo‘lgan va o‘sha paytda poyezd yo‘lovchilarni tashimagan.

«Mutaxassislar voqea joyiga tezda yetib kelishdi va yong‘inni muvaffaqiyatli bartaraf etishdi», — deyiladi munosabatda.

Ta’kidlanishicha, «Afrosiyob» elektropoyezdining barcha reyslari jadvalda o‘zgarishsiz amalga oshiriladi.

«O‘zbekiston temiryo‘llari» yong‘in tafsilotlari haqida keyinroq xabar berilishini ma’lum qildi.