Narpay tumanida 16 yoshli yigit suvga cho‘kib halok bo‘ldi

Samarqand viloyatining Narpay tumanida 16 yoshli yigit suvga cho‘kish oqibatida vafot etdi. Bu haqda Kun.uz manbasi xabar berdi.

Bosh prokuror matbuot kotibi Hayot Shamsutdinovning Kun.uz’ga ma’lum qilishicha, Paxtachi tuman IIBning 2025 yil 18 iyundagi xabariga ko‘ra, tumanning Istiqlol mahallasi hududidan oqib o‘tuvchi Narpay kanalidan 2009 yilda tug‘ilgan A.S.ning murdasi topilgan. Murda yigitning yaqin qarindoshlari tomonidan tanib olingan.

Narpay tuman IIBga ko‘ra, A.S. murdasi topilishidan bir necha kun oldin yaqin qarindoshlari bilan kanalning Narpay tumani Narpay mahallasi hududidan o‘tgan qismiga cho‘milishga borgan. U cho‘milish jarayonida suvga oqib ketgan.

Voqea joyi tuman prokuraturasi tergovchisi tomonidan ko‘zdan kechirilib, marhumning o‘lim sababini aniqlash maqsadida sudga oid tibbiy ekspertiza tayinlangan. Hozirda holat yuzasidan Narpay tuman prokuraturasi tomonidan tergovga qadar tekshirish harakatlari olib borilmoqda.

Oldinroq Parkentda 3 bola, undan avval esa Paxtachida 3 o‘quvchi suvga cho‘kib halok bo‘lgandi.