БМТ: Исроилнинг Ғазога инсонпарварлик ёрдамини блоклаши ҳаёт учун хавф туғдирмоқда

Бирлашган Миллатлар Ташкилоти Исроилнинг Ғазо секторига инсонпарварлик ёрдамини чеклашда давом этаётганидан жиддий хавотир билдирди ва уларни «ҳаётга таҳдид» деб атади.

Матбуот анжуманида БМТ вакили Стефан Дюжаррик Исроилнинг эксклавга инсонпарварлик оқимини блоклашининг ҳалокатли оқибатларини таъкидлади.

«Ғазода сулҳга эришилмаган ҳар куни олдини олиш мумкин бўлган ўлимларга олиб келяпти. Болалар изтиробда ўлмоқда, инсонлар гуманитар ёрдам олишга ҳаракат қилганда отиб ташланмоқда», — дейди у.

Дюжаррик, шунингдек, Ғазо секторидаги ёнилғи инқирозининг кучайишига эътибор қаратди.

«Сўнгги икки кун ичида биз 75 минг литрга яқин ёнилғи етказиб беришга муваффақ бўлдик, бироқ бу ҳаётий функцияларни сақлаб қолиш учун зарур бўлган миқдорнинг кичик бир қисми», — деди у.

Дюжаррикнинг сўзларига кўра, агар чекловлар зудлик билан бекор қилинмаса, Ғазода асосий хизматлар тақдим этилиши хавф остида қолади.

Шунингдек, у Исроил БМТга эксклавнинг шимолий қисмига ёнилғи етказиб беришга тўсқинлик қилаётганини ва вайроналар остида 18 киши қолиб кетган Ғазо шаҳри ҳудудига киришни тўсиб қўйганини айтди — уларнинг барчаси ҳалок бўлди.

Бундан ташқари, Исроил расмийлари билан келишилган 15 гуманитар операциядан фақат олтитаси тўлиқ амалга оширилган. Исроил, шунингдек, 130 кундан ортиқ вақт давомида вақтинчалик уй-жой қуриш учун қурилиш материалларини олиб киришга рухсат бермаяпти, дея қўшимча қилди БМТ вакили.