Sharoit yaratib berilsa, yoshlar davlatga ko‘makchi bo‘ladi – prezident

«Bir narsani tushuninglar, yoshlar muammolarini faqatgina Yoshlar agentligi yoki Yoshlar ittifoqining o‘zi hal qiladi, deb o‘ylasak, xato bo‘ladi.

Hali oldimizda bu borada o‘z yechimini kutayotgan ko‘plab vazifalar turibdi.

Yoshlar bandligini ta'minlash va ularga munosib daromad olishi uchun sharoit yaratib berish – eng muhim vazifa hisoblanadi.

Yana bir bor takrorlayman, bu boradagi eng katta imkoniyat va zaxiramiz, bu – tadbirkorlik, ayniqsa, kichik va o‘rta biznesdir», degan prezident.

Birinchi chorakda 12 ming nafar «yoshlar daftari»ga kirganlarga 255 milliard so‘m kredit ajratilgani ma'lum qilindi.

«Lekin faqat kredit berish bilan ish bitmaydi-ku? Yo‘lini qilish kerak, gazini, svetini ulab berish kerak. Sharoit yaratib berilsa, yoshlar davlatga ko‘makchi bo‘ladi.

Lekin, ular mustaqil ravishda tadbirkor bo‘lib, oyoqqa tura oladimi, degan savol hokimlar, sektor rahbarlari va sohaga mas'ullarni har kuni o‘ylantirishi kerak.

Misol uchun, joriy yilning o‘tgan davrida Jondor tumanida 813 nafar yoshlarga kredit ajratilgan. Respublika bo‘yicha o‘rtacha 158 nafar», – deya davlat rahbarining so‘zlarini keltirmoqda Kun.uz muxbiri.