Farg‘onada 550 mln so‘mlik ko‘mir «qora bozor»da sotib yuborilgan

Qayd etilishicha, joriy yilning 10 avgust kuni Farg‘ona viloyati IIB TXTBga kelib tushgan ma'lumotga ko‘ra, shu yil 6 iyul kuni Qo‘qon birlashgan yonilg‘i ombor xo‘jaligi Farg‘ona viloyati Oltiariq ko‘mir ombori ko‘rikdan o‘tkazilgan.

IIV ma'lumotiga ko‘ra, Oltiariq ko‘mir ombori mudiri lavozimida ishlovchi fuqaro o‘zining moddiy javobgarligida bo‘lgan umumiy narxi 541 020 000 so‘mlik 852 000 tonna “BR3” markali ko‘mir mahsulotlarini o‘z manfaatini ko‘zlab “qora bozor”da sotib yuborgani ma'lum qilinib, unga nisbatan qonuniy chora ko‘rilishi hamda yetkazilgan moddiy zarar undirilishida amaliy yordam berilishi so‘ralgan.

Tergovga qadar tekshiruv harakatlari davomida, fuqaro o‘ziga biriktirilgan, aholi va budjet tashkilotlariga tarqatilishi lozim bo‘lgan 852 000 tonna “BR3”markali ko‘mir mahsulotlarini pulini keyinchalik berish sharti bilan tanishlariga arzon narxda sotib yuborgani aniqlangan.

Holat yuzasidan Jinoyat kodeksining 167-moddasi 3-qismi “a” bandi bilan jinoyat ishi qo‘zg‘atilgan.