ITB O‘zbekistonda onkologik xizmatlarni rivojlantirish uchun 80 million dollar ajratadi

Islom taraqqiyot banki O‘zbekistonda onkologik xizmatlarni rivojlantirish loyihasini qo‘llab-quvvatlash uchun 80 million dollar ajratadi. Kelishuv bugun, 4 sentyabr kuni Toshkentda yakunlanayotgan ITB boshqaruvchilar kengashi yig‘ilishi doirasida imzolandi.

Loyihaning maqsadi – onkologiya markazlarini qurish/qayta tiklash va jihozlash, institutsional va kadrlar salohiyatini rivojlantirish, ko‘rsatmalar va bayonnomalarni ishlab chiqish va yangilash, tegishli tibbiyot kasblarini yaratish va yangilash orqali xavfsiz va yuqori sifatli onkologiya xizmatlaridan foydalanish imkoniyatlarini kengaytirishdir.

Shu jumladan, o‘quv dasturlari, akademik ta'lim, klinik tayyorgarlik, radiatsiyadan himoya va xavfsizlikning yuqori darajasini ta'minlash bo‘yicha ishlar olib boriladi.

Bundan tashqari, O‘zbekiston Xalqaro islom akademiyasi huzurida Islom taraqqiyotining aqlli sinfini tashkil etish uchun 51,5 million dollar yordam granti taqdim qilinadi. Ikki tomonlama shartnoma Xalqaro islom Akademiyasi rektori Bahrom Mamadiyev va ITB Mamlakat dasturlari bo‘yicha vitse-prezidenti Mansur Muxtor o‘rtasida imzolandi.

Shuningdek, O‘zbekistondagi 4ta xususiy bank: Kapitalbank, Trastbank, Orient Finans Bank va InFinBank bilan har biriga 10 million dollar miqdorida pul ajratilishi bo‘yicha kelishuv imzolandi. Bu mablag‘lar banklar tomonidan sog‘liqni saqlash sohasini qo‘llab-quvvatlash, shuningdek, shariatga muvofiq O‘zbekistondagi COVID-19 pandemiyasidan zarar ko‘rgan, xususiy sektor va tadbirkorlik sub'yektlarining mudofaa, sayyohlik, hordiq chiqarishga o‘xshash faoliyat turlaridan tashqari barcha iqtisodiy faoliyatini qo‘llab-quvvatlash uchun sarflanishi belgilandi.