Navoiy viloyatining turizm qishlog‘i – Sentobda nimalarni ko‘rish mumkin?

{Yii::t(}

O'tkazib yuborish 6s

O'tkazib yuborish

Sentob Navoiy viloyatining turizm qishloqlaridan biri hisoblanadi. Bu yerda keyingi yillarda sayyohlar uchun mehmon uylari tashkil etilib, hududning diqqatga sazovor joylariga turistik marshrutlar tuzildi.

Baland tog‘lar, tik qoyalar qishloqning tabiatiga o‘zgacha go‘zallik bag‘ishlagan. Mazkur qoya toshlarda V-VI asrlarga oid petrogliflarni, XI-XVIII asrlarga oid toshga o‘yilgan yozuvlarni ko‘rish mumkin. Shuningdek, tog‘ tepasida ko‘hna qo‘rg‘on qoldiqlari bor. Mahalliy aholining aytishicha, ushbu qo‘rg‘onda yaqin yillargacha insonlar istiqomat qilgan.

3 ming nafarga yaqin aholi yashaydigan qishloqning asosiy ichimlik suv manbai “Ako” chashmasi hisoblanadi. Suvi sira kamaymaydigan ushbu chashma ancha chuqurda joylashgan. Unga so‘qmoq yo‘l orqali tushib boriladi. Odamlar eshaklar yordamida chashmadan suv tashib ketishadi.

“Keyingi yillarda qishlog‘imizga Germaniya, Fransiya, Ispaniya, Italiya, Gollandiya, Avstraliya, Shveytsariya, Belgiya kabi davlatlardan sayyohlar oqimi ko‘paydi. Ular tarixiy joylarimizni ko‘rib, tog‘ marshrutlariga borishadi. Hududimizda qadimiy joylarimiz ko‘p. Buloqlarimiz, ko‘llarimiz, sharsharalarimiz, tog‘ tepasida qo‘rg‘on qishlog‘imiz bor. Sayyohlar asosan shularni tomosha qilishadi”, — deydi “Guest House Mutabar’S” mehmon uyi rahbari Shodiboy Boboyev.

Sentobning eng diqqatga sazovor joyi dengiz sathidan 1 644 metr balandlikda, tog‘lar ustida joylashgan Fozilmon ko‘lidir. Uning uzunligi 300, kengligi 150 metr.  

Navoiy viloyati turizm va sport boshqarmasi axborot xizmatiga ko‘ra, Sentobda yaqin yillarda mehmon uylarini ko‘paytirish va sayyohlar uchun qulay shart-sharoitlar yaratish borasida qator loyihalarni amalga oshirish rejalashtirilgan.

Ruslan Saburov, Kun.uz muxbiri.
Montaj ustasi — Jahongir Aliboyev.