Rossiyada yuqori martabali amaldorlarga ishdan bo‘shab ketish taqiqlandi

Rossiya prezidenti ma’muriyatida lavozimni tark etish istagi xiyonat sifatida baholanyapti va bo‘shamoqchi bo‘lgan amaldorlarga jinoiy ish qo‘zg‘atilishi mumkin, deb yozadi "Vajnyye istorii".

Foto: AFP / Scanpix

Rossiyaning Ukrainaga qarshi urushi fonida yuqori martabali rossiyalik amaldorlarga o‘z lavozimlarini tark etish taqiqlandi. Bu haqda 15 may, dushanba kuni "Vajnyye istorii" internet nashri Federal xavfsizlik xizmati sobiq xodimi, Rossiya gubernatorlaridan biri bilan ishlovchi siyosiy strateg, shuningdek, prezident ma’muriyati yuqori martabali amaldorlariga yaqin ikki kishiga tayanib yozmoqda.

Kamida ikkita gubernator o‘z lavozimini tark etishga uringan, ammo davlat rahbari ma’muriyati "nafaqat buni taqiqlab qo‘ydi, balki jinoiy ish ochilishiga ishora qildi", deb ta’kidladi "FSB" sobiq zobiti. Qaysi viloyatlar rahbarlari haqida gap ketayotganiga aniqlik kiritilmagan.

Rossiya Federatsiyasining qo‘shni davlatga harbiy bostirib kirishi ortidan ko‘plab rossiyalik amaldorlar ishdan bo‘shab ketishni xohlab qoldi, dedi boshqa manba. Biroq, Kremlda bunday istak "xiyonat sifatida qabul qilinyapti, shuning uchun davlat xizmatchilariga "birdamlikni namoyish etish" vazifasi qo‘yildi", deb ta’kidlaydi "Vajnyye istorii". Ayni paytda, taqiq norasmiydir, shuning uchun ba’zi amaldorlarga iste’foga chiqishga ruxsat berilishi mumkin - sog‘lig‘i sababli yoki korrupsiya tufayli, deb qo‘shimcha qiladi nashr.

#amaldor #Rossiya