Ommaviy ahamiyatga ega noyob obektlar eskiz loyihasi bo‘yicha arxitektura tanlovi o‘tkaziladi

Vazirlar Mahkamasining «Ommaviy ahamiyatga ega noyob va alohida muhim obektlarning eskiz loyihasini ishlab chiqish uchun buyurtmachi xizmati tomonidan arxitektura tanlovini o‘tkazish tartibi to‘g‘risidagi nizomni tasdiqlash haqida»gi qarori qabul qilindi.

Nizom ommaviy ahamiyatga ega noyob va alohida muhim obektlarning eskiz loyihasini ishlab chiqish uchun buyurtmachi xizmati tomonidan arxitektura tanlovini o‘tkazish tartibini belgilaydi.

Buyurtmachi xizmati: tanlovga qo‘yiladigan obektni Iqtisodiyot va moliya vazirligining g‘aznachilik tizimida ro‘yxatdan o‘tkazadi; tanlovni o‘tkazish shakli, loyihaning tavsifi va boshlang‘ich narxi, tanlovni o‘tkazish joyi, moddiy rag‘bat miqdori va taklif berish muddati haqida «Shaffof qurilish» milliy axborot tizimi orqali e’lon beradi.
 
Tanlovda faqatgina arxitektura-shaharsozlik hujjatlarini ishlab chiqish, xavfi yuqori bo‘lgan obektlarni va potensial xavfli ishlab chiqarishlarni loyihalashtirish, qurish hamda ulardan foydalanish faoliyati bilan shug‘ullanish huquqini beruvchi litsenziyalarga ega bo‘lgan loyiha tashkilotlari ishtirok etishi mumkin.

Ishtirokchilar takliflari quyidagi tarkibdagi komissiya tomonidan baholanadi:

• Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlarining o‘rinbosarlari;
• Iqtisodiyot va moliya vazirligining hududiy boshqarmalari boshliqlari;
• obekt bo‘yicha buyurtmachi xizmati rahbari;
• obektdan yakuniy foydalanuvchi tashkilot rahbari;
• hududiy arxitektura-shaharsozlik kengashi a’zolari.