Rossiya Boltiqbo‘yi davlatlaridan 347 kishining mamlakatga kirishini taqiqladi

Rossiya 347 nafar Litva, Latviya va Estoniya fuqarolari – vazirlar, parlament a’zolari, jamoat arboblari va jurnalistlarning o‘z hududiga kirishini taqiqladi. Qaror Boltiqbo‘yi davlatlarining Rossiyaga nisbatan «dushmanlik siyosati» va uch davlatning Rossiya Federatsiyasiga qarshi sanksiya choralari bo‘yicha «faol lobbichiligi» bilan bog‘liq, deb xabar qildi 12 mart, seshanba kuni Rossiya TIV matbuot xizmati.

Bundan tashqari, Moskva Latviya, Litva va Estoniyani «Rossiyaning ichki ishlariga aralashishda», «rusiyzabon aholini ta’qib qilishda» va «sovet askarlari yodgorliklarini ommaviy ravishda buzish kampaniyasida», shuningdek, uch yildan beri keng ko‘lamli hujumdan o‘zini himoya qilib kelayotgan Ukrainaga qurol-yarog‘ yetkazib berishda aybladi.

Ro‘yxatga Latviya va Estoniyaning sobiq prezidentlari Vayra Vike-Freyberga va Kersti Kalyulayd, Estoniya va Latviya bosh vazirlari Kaya Kallas va Evika Silinya, uch mamlakat tashqi ishlar vazirlari Krishyanis Karinsh, Gabrielyus Landsbergis va Margus Tsaxkna, shuningdek, ushbu davlatlar mudofaa, adliya, moliya hamda ichki ishlar vazirliklari rahbarlari, parlament spikerlari va deputatlari kirgan. Bayonotda to‘liq ro‘yxat keltirilmagan. Smolenskaya maydonida ta’kidlanganidek, ro‘yxat istalgan vaqtda kengaytirilishi mumkin. 

Rossiya o‘nlab yevropalik siyosatchilarni qidiruvga bergan

Fevral oyida Rossiya Ichki ishlar vazirligi Estoniya bosh vaziri Kaya Kallasni «Jinoyat kodeksining moddasi bo‘yicha» qidiruvga bergani ma’lum bo‘ldi. Estoniya davlat kotibi Taymar Peterkop, Litva madaniyat vaziri Simonas Kayris hamda Boltiqbo‘yi mamlakatlari rasmiylarining boshqa vakillari, jumladan, Latviyadan 83 nafar siyosatchi va amaldor ham qidiruvga berilgan. 

Ichki ishlar vazirligi Boltiqbo‘yi siyosatchilari qidiruvga berilishining aniq sabablarini aytmayapti, biroq Rossiya prezidenti matbuot kotibi Dmitriy Peskov tushuntirish berdi. «Bular tarixiy xotirani haqiqatan ham buzgan qarorlar uchun mas’ul bo‘lganlardir. Bular ham tarixiy xotiraga, ham mamlakatimizga dushmanona harakatlar qilmoqda», - dedi u. Umuman olganda, Rossiya Ichki ishlar vazirligi sovet obidalari buzilishi munosabati bilan kamida 160 nafar yevropalik siyosatchi va amaldorni qidirmoqda.