Navalniyning advokatlari ustidan mahkama yopiq eshiklar ortida o‘tadi

Vladimir oblasti Petushinskiy tuman sudida 12 sentabr, payshanba kuni marhum rossiyalik muxolifatchi Aleksey Navalniyning uch advokati ustidan ochilgan sud jarayoni yopiq rejimga o‘tkazildi. «Mediazona» xabariga ko‘ra, Ekstremizmga qarshi kurash markazi («E» markazi) Navalniy asos solgan Korrupsiyaga qarshi kurash fondi («FBK») go‘yoki provokatsiyalar tayyorlayotgani haqidagi ogohlantirishidan so‘ng sudya Yuliya Shilova prokuror talabini qanoatlantirgan va jarayonni yopiq deb e’lon qilgan.

Shilova markazning xatida obektiv ma’lumotlar bor deb hisobladi. O‘z navbatida, sudlanuvchilardan birining advokati ogohlantirishda faqat Ichki ishlar vazirligi xodimlari fikri borligini va bu ma’lumotlar hech qanday tasdig‘i yo‘qligini ta’kidladi. Sud yopiq deb e’lon qilingach, barcha eshituvchilar va jurnalistlar zaldan chiqarildi.

Advokatlar «ekstremistik hamjamiyatda ishtirok etish»da ayblanmoqda

Navalniyning sobiq advokatlari Vadim Kobzev, Aleksey Lipser va Igor Sergunin «ekstremistik hamjamiyatda ishtirok etish»da ayblanmoqda. Ularni sudda jami besh nafar himoyachi himoya qiladi.

Advokatlar 2023 yil 13 oktyabrdan beri tergov hibsxonasida. O‘sha yilning noyabr oyida Rosfinmonitoring Kobzev, Lipser va Serguninni ekstremistlar va terrorchilar ro‘yxatiga qo‘shdi. Tergov ma’lumotlariga ko‘ra, Navalniyning advokatlari o‘z maqomlaridan foydalanib, siyosatchi koloniyadagi maktublarini uning sheriklariga yetkazishgan, shu bilan «ekstremistik hamjamiyat rahbarlari va ishtirokchilari o‘rtasida muntazam ravishda ma’lumotlar uzatilishini» ta’minlagan. Aleksey Navalniy tuzilmalari, shu jumladan «FBK» Rossiya hukumati tomonidan 2021 yilning iyun oyida ekstremistik deb e’lon qilingan edi.

May oyida Igor Sergunin aybiga iqror bo‘lgani va ish bo‘yicha guvohlik berayotgani ma’lum bo‘ldi. Iyun oyida har uchala ayblanuvchi ham Moskva tergov izolyatoridan Vladimirdagi 1-tergov izolyatoriga ko‘chirildi va ish materiallari Petushinskiy tuman sudiga yuborildi. Advokatlar vakillari ularning ishini ko‘rib chiqishni Moskvaga o‘tkazishni so‘rashdi, biroq Rossiya Federatsiyasi Oliy sudi ularning iltimosini rad etdi.