Haj va Umra ziyoratlarini noqonuniy tashkil etishga uringan sayyohlik firmalari aniqlandi

Toshkent shahrida faoliyat yurituvchi turistik firmalardan birining 4 nafar xodimi 3 nafar fuqaroni ishchi vizasi orqali Haj ziyoratiga yuborish evaziga 7 ming AQSh dollaridan hamda 1 nafar fuqaroni sayyohlik vizasi orqali yuborish evaziga 5 ming AQSh dollari, jami 26 ming AQSh dollari talab qilishib, oldindan 20 ming AQSh dollari olgan vaqtida ushlandi. Bu haqda Davlat xavfsizligi xizmati xabar berdi.

Shuningdek, DXX Farg‘ona viloyati bo‘yicha boshqarmasi hamda ichki ishlar organlari xodimlari hamkorligida o‘tkazilgan tezkor tadbirda Marg‘ilon shahrida faoliyat yurituvchi turistik firmaning ish yurituvchisi 2 nafar fuqaroni Umraga yuborish evaziga 2400 AQSh dollari, shuningdek, 3 nafar fuqaroni Hajga yuborish evaziga 15 ming AQSh dollari olgan vaqtida ashyoviy dalillar bilan ushlandi.

Shu bilan birga, DXX Namangan viloyati bo‘yicha boshqarmasi xodimlari tomonidan ichki ishlar organlari bilan hamkorlikda o‘tkazilgan tezkor tadbirda, Namangan shahrida yashovchi, 1999 yilda tug‘ilgan shaxs Hajga yuborish haqida ijtimoiy tarmoqlarga soxta e’lonlar joylab, 3 nafar fuqaroning ishonchiga kirib, ularning har biridan 4900 AQSh dollari, jami 14700 AQSh dollari olgan vaqtida ushlandi.

Shuningdek, DXX Namangan viloyati bo‘yicha boshqarmasi va ichki ishlar organlari xodimlari hamkorligida o‘tkazilgan tezkor tadbirda Chust tumanida faoliyat yurituvchi turistik firma rahbari Umrani tashkil etish uchun tegishli litsenziyaga ega bo‘lmay turib, 3 nafar fuqaroni 1350 AQSh dollaridan, jami 4050 AQSh dollariga Umraga yuborishini aytib, shundan 4 ming AQSh dollarini olgan vaqtida ashyoviy dalillar bilan ushlangan.

Iqtisodiy jinoyatlarga qarshi kurashish departamenti hamkorligida o‘tkazilgan tezkor tadbirda Toshkent shahrida yashovchi, 1998 yilda tug‘ilgan shaxs poytaxtda faoliyat yurituvchi mas’uliyati cheklangan jamiyat orqali 5 nafar fuqaroni jami 27 ming AQSh dollari evaziga Haj vizasi asosida diniy amallarni bajarish uchun Saudiya Arabistoniga yuborishni va’da qilib, oldindan 13500 AQSh dollari olgan vaqtida ushlangan.

Ta’kidlanishicha, mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.