O‘zbekiston Rossiya fuqarolarining mamlakatga kirishini yengillashtirishi mumkin

Rossiya, Qozog‘iston va Ozarboyjon fuqarolarining ichki pasportdan foydalangan holda O‘zbekistonga kirishini soddalashtirish bo‘yicha ishlar boshlandi. Bu haqda Rossiyaning «Izvestiya» nashri O‘zbekiston Tashqi ishlar vazirligiga tayanib xabar berdi.

— Biz hamkor mamlakatlar fuqarolarining kirishini soddalashtirish, jumladan, ichki pasport yoki ID karta bilan 30 kungacha bo‘lgan muddatga kirishiga ruxsat berish ustida ishlayapmiz. Tashqi ishlar vazirligi bu borada muzokaralar olib bormoqda, takliflar tayyorlamoqda. Muddat kelishuvlarga bog‘liq, biroq mamlakat qulay sayohatni ta’minlash, turizm va ishbilarmonlik aloqalarini mustahkamlashga intilmoqda, deb «Izvestiya» TIV matbuot xizmatidan iqtibos keltirdi.

O‘zbekiston va Qirg‘iziston o‘rtasida ichki hujjatlardan foydalangan holda kirish tizimi allaqachon amal qilyapti. 2023 yildan boshlab ikki respublika fuqarolari umumiy chegaradan chet el pasporti bilan birga ID karta bilan ham o‘tishi mumkin.

Rossiya fuqarolari Markaziy Osiyoda ayni paytda ichki pasport bilan faqat Qozog‘iston va Qirg‘izistonga kirishi mumkin. Biroq, Turkmanistondan tashqari barcha davlatlar bilan vizasiz rejim mavjud.

O‘zbekistonga kirish uchun hozir Rossiya fuqarolariga chet el pasporti kerak bo‘ladi. Respublikaga 15 kundan ortiq muddatga kelgan rossiyaliklar mamlakatda bo‘lishning 15-kunidan kechiktirmay mehmonxonada yoki pasport idorasida yashash joyida vaqtincha ro‘yxatdan o‘tishi kerak.

Ta’kidlanishicha, kirish rejimining qulayligi birinchi navbatda turistik sayohatlarning o‘sishiga ta’sir qiladi. 2024 yilda Rossiyadan O‘zbekistonga kelgan sayyohlar soni 20 foizga oshib, 870 ming kishiga yetdi. 2025 yilda mamlakat 1 million rossiyalik sayyohni qabul qilishni reja qilgan.