Қўшимча функционаллар
-
Тунги кўриниш
Трамп Яқин Шарқ туфайли G7 саммитини зудлик билан тарк этди
АҚШ президенти Оқ уйда миллий хавфсизлик бўйича йиғилиш ўтказди. У ўз блогида Эрон ядро қуролига эга бўлмаслиги кераклигини ёзди ва Теҳронни тўлиқ эвакуация қилишга чақирди.
Фото: REUTERS
16 июн, душанба куни АҚШ президенти Доналд Трамп Канаданинг Кананаскис шаҳрида бўлиб ўтадиган G7 саммитидаги иштирокини зудлик билан тўхтатишга қарор қилди. Бу қадамга Яқин Шарқдаги вазият сабаб бўлди, деб хабар берди Оқ уй матбуот хизмати.
Трампнинг матбуот котиби Кэролайн Ливитт X ижтимоий тармоғида Америка етакчиси саммитда Буюк Британия бош вазири Кир Стармер билан йирик савдо битимини имзолаган ҳолда «кунни ажойиб ўтказганини» ёзди. «Кўп нарсага эришилди, бироқ Яқин Шарқда содир бўлаётган воқеалар туфайли президент Трамп бугун кечқурун давлат раҳбарлари билан кечки овқатдан кейин жўнаб кетади», — деди Ливитт.
CBS News телеканалига кўра, АҚШ давлат котиби Марко Рубио Оқ уй раҳбари билан бирга Канададан Вашингтонга учмоқда. CNN телеканали хабар беришича, Трамп ўз маъмуриятининг миллий хавфсизлик ходимларига Вашингтонда Оқ уйдаги махсус хонага тўпланишни буюрган. Бу АҚШ президенти, унинг маслаҳатчилари, ҳарбий ва разведка идоралари вакиллари томонидан инқирозли вазиятларда шошилинч йиғилишлар учун фойдаланиладиган хоналар мажмуасидир. Махсус хонасида ўрнатилган алоқа ускуналари давлат раҳбарига бутун дунё бўйлаб Америка қўшинларига қўмондонлик қилиш имконини беради.
Ливиттнинг хабаридан тахминан бир соат олдин Америка етакчиси ўзининг Truth Social ижтимоий тармоғида пост эълон қилди ва унда «Эрон ядро қуролига эга бўлмаслиги керак» деб яна бир бор таъкидлади. «Ҳамма Теҳрондан зудлик билан эвакуация қилиниши керак», деб ёзган АҚШ президенти.
