АҚШ Конгресси Украинага янги ёрдамни маъқулламайди

АҚШ Конгресси Украинага янги ёрдам кўрсатишни маъқулламайди, деди Вакиллар палатаси спикери Майк Жонсон 20 феврал, пайшанба куни Newsmax телеканалида. У Украинага кейинги ёрдам кўрсатишдан манфаатдор эмаслигини ва Киевга маблағ ажратишни тўхтатиш кераклигини тушунтирди, чунки «буларнинг барчаси узоқ вақтдан бери давом этмоқда».

«Ҳеч кимнинг иштиёқи йўқ», деди республикачи Жонсон. У Украинадаги урушни биринчи навбатда тугатиш кераклигини таъкидлади. «Ва шуни айта оламанки, бизнинг европалик иттифоқчиларимиз ҳам бу заруратни тан олишади», — дея қўшимча қилди сиёсатчи. Қўшма Штатларда бюджет масалалари биринчи навбатда Вакиллар палатаси томонидан ҳал қилинади, бу ерда президент Доналд Трамп сиёсатини қўллаб-қувватловчи республикачилар кўпчиликни ташкил қилади, дея қайд этади Reuters.

Вэнс: Янги қурол етказиб бериш Украинага ёрдам бермайди

Шу куни АҚШ вице-президенти Жей Ди Вэнс Украина Россияни мағлуб эта олмаслигини айтди, чунки у катта сонли устунликка эга ва Европанинг қурол-яроғ захиралари тугайди. Вэнс, шунингдек, на Европа, на АҚШнинг аввалги президенти Жо Байден маъмурияти, на украиналиклар «ғалаба сари йўлга эга бўлмагани»ни билдирди. «Уч йил олдин бу ҳақиқат эди, икки йил олдин ҳам, ўтган йили ҳам, бугун ҳам шундай», дейди Вэнс.