Andijonda profilaktika inspektorini pichoqlagan shaxs ushlandi, Taxtaqoracha dovonida yong‘in chiqdi - mahalliy dayjest

Shavkat Mirziyoyev Eronga nisbatan olib borilgan harbiy harakatlar haqida gapirdi. Andijonda profilaktika inspektorini pichoqlagan shaxs ushlandi. Taxtaqoracha dovonida yong‘in chiqdi. Toshkent metrosining 13 ta bekatida kassa yopildi. Ohangaron shahar hokimligining mansabdor xodimi tezkor tadbirda qo‘lga olindi. Kun davomida Kun.uz yoritgan shu va boshqa muhim mahalliy yangiliklar bilan tanishtiramiz.

{Yii::t(}

O'tkazib yuborish 6s

O'tkazib yuborish

Profilaktika inspektorini pichoqlagan shaxs ushlandi

Andijon viloyati Xo‘jaobod tumanida profilaktika inspektorini pichoqlab o‘ldirgan shaxs «So‘qoloq» qabristonidagi makkapoya ichida yashirinib yotganida ushlandi.

Gumonlanuvchi qo‘lga olish jarayonida o‘zining qorin qismiga pichoq bilan jarohat yetkazgan hamda birinchi tez tibbiy yordam ko‘rsatilib, shifoxonaga olib borilgan.

Hozirda mazkur holat yuzasidan Jinoyat kodeksining «qasddan odam o‘ldirish» bandi bilan jinoyat ishi qo‘zg‘atilgan, tergov harakatlari olib borilmoqda.

Eslatib o‘tamiz, 1 iyul kuni Xo‘jaobod tumanida oila a’zolariga pichoq bilan tahdid qilayotgan 65 yoshli erkak chaqiruvga asosan voqea joyiga yetib kelgan profilaktika inspektori Abdurasul Abduvaliyevni pichoq bilan jarohatlagandi. IIB xodimi shifoxonaga olib ketilayotgan vaqtda vafot etgan. Qotil esa voqea joyidan yashiringandi.

«Tashabbusli budjet»ning 2-mavsumi 15 iyuldan boshlanadi

«Tashabbusli budjet» jarayonlarining 2025 yilgi 2-mavsumi 15 iyuldan boshlanib, 31 avgust kuni oxiriga qadar davom etadi.

Bunda loyihani kiritish bosqichi — 15 iyul – 3 avgust kunlari, saralash bosqichi — 4-18 avgust, targ‘ibot va ovoz berish bosqichi 19-31 avgust kunlari o‘tkaziladi.

Joriy yildagi 2-mavsum g‘oliblari 1 sentabr — Mustaqillik bayrami kuni e’lon qilinadi.

Ohangaron shahar hokimligining mansabdor xodimi tezkor tadbirda qo‘lga olindi

Ohangaron shahar hokimligining bo‘lim boshlig‘i qo‘lga olindi.

Ma’lum qilinishicha, ushbu mansabdor shaxs xizmat mavqeyidan foydalangan holda 1958 yilda tug‘ilgan fuqaroning ishonchiga kirib, hozirda hokimiyat balansiga o‘tkazilishi rejalashtirilayotgan 3 xonali xonadonni sud tizimidagi tanishlari orqali uning nomiga rasmiylashtirib berishni va’da qilgan.

U uyning narxini 15 ming dollarga kelishgan hamda sud organlaridagi tanishlari uchun 3,5 ming dollar berishini aytib, jami 18,5 ming dollar talab qilgan. Kelishilgan pulning 9,5 ming dollarini oldindan olgan vaqtida DXX Toshkent viloyati bo‘yicha boshqarmasi va Iqtisodiy jinoyatlarga qarshi kurashish departamentining hududiy boshqarmasi xodimlari tomonidan ashyoviy dalillar bilan ushlangan.

Hozirda hokimiyat vakiliga nisbatan jinoyat ishi qo‘zg‘atilib, qamoq ehtiyot chorasi qo‘llangan.

Taxtaqoracha dovonida yong‘in chiqdi

Qashqadaryo viloyatining Kitob tumani Taxtaqoracha dovonidagi yer maydonlarida quruq o‘t yonib ketdi.

Favqulodda vaziyatlar vazirligiga ko‘ra, 4 iyul kuni soat 12:08 da boshqarmaga Qashqadaryo viloyati Kitob tumani «Qaynar» MFY hududidagi qir-adirliklarida quruq o‘t yonayotgani to‘g‘risida xabar kelib tushgan.

Shunga ko‘ra, 2 ta yong‘in-qutqaruv ekipaji voqea joyiga yetib borib, yong‘inni bartaraf etish ishlarini boshlagan.

Ijtimoiy tarmoqlarda tarqalgan videolarda yong‘in kuchli bo‘lib, osmonni tutun qoplaganini ko‘rish mumkin.

Qayd etilishicha, ushbu yong‘in Taxtaqoracha dovonidan o‘tgan avtomobil yo‘liga xavf solmagan. Dovonda ikki tomonlama avtomobillar harakati davom etmoqda.

«Kitob tumani «Qaynar» MFY qir-adirligida sodir bo‘lgan yong‘in o‘rab olingan. Hozirda yong‘inni bartaraf etish ishlari davom etmoqda. Yong‘in ko‘lami qisqarib bormoqda. Aholi punktlari hamda Taxtaqoracha dovonidan o‘tgan avtomobil yo‘lida yong‘in xavfi mavjud emas», – deyilgan vazirlik matbuot xizmati xabarida.

Toshkent metrosining 13 ta bekatida kassa yopildi

Toshkent metropolitenining Mirzo Ulug‘bek, Xalqlar do‘stligi, Paxtakor, Hamid Olimjon, Pushkin, Do‘stlik, Toshkent, Oybek, Tinchlik, Shahriston, Bodomzor, Minor hamda Abdulla Qodiriy stansiyalarida kassalar yopildi, bunga chipta xarid qilish ko‘rsatkichi keskin kamaygani sabab bo‘ldi.

Qayd qilinishicha, uzoq vaqt davom etgan kuzatuv va o‘rganishlar natijalariga ko‘ra, bir qancha metro bekatlaridagi vestibyullarda joylashgan kassalarda chiptalar harid qilish ko‘rsatkichi keskin kamaygani aniqlangan. Shu boisdan, naqd pul ko‘rinishida to‘lovni amalga oshiruvchi yo‘lovchilar soni kam bo‘lgan metro bekatlaridagi kassalar yopilgan.

Ta’kidlanishicha, yo‘lovchilar kassa yopilgan vestibyullarda avtomatlashtirilgan to‘lov turlarining boshqa usullari orqali to‘lov qilish imkoniyatiga ega.

Shavkat Mirziyoyev Eronga nisbatan olib borilgan harbiy harakatlar haqida gapirdi

Shavkat Mirziyoyev Xonkendi shahrida Iqtisodiy hamkorlik tashkilotining 17-sammitida ishtirok etdi.

Davlat rahbari so‘zining avvalida xavfsizlik va barqaror taraqqiyotga tahdid solayotgan xavf-xatarlarni qayd etdi. O‘zbekiston yetakchisi mojaro va nizolarni diplomatiya va konstruktiv muzokaralar yo‘li bilan hal etish muhim ekanini yana bir bor ta’kidladi.

Shu bilan birga, Falastin-Isroil ziddiyatini adolatli hal etmasdan turib, Yaqin Sharqda tinchlik va barqarorlikka erishib bo‘lmasligi ta’kidlandi.

O‘z nutqi davomida Shavkat Mirziyoyev xalqaro huquq va global xavfsizlik institutlari tanazzuli muloqot va hamkorlikni yanada zaiflashtirib, kuch ishlatish va zo‘ravonlikka keng yo‘l ochayotganini bildirdi. Xususan, tashkilot a’zosi bo‘lgan Eron Islom Respublikasiga nisbatan olib borilgan harbiy harakatlar butun mintaqani urush girdobiga tortishi, keng miqyosdagi ekologik halokat o‘chog‘ining vujudga kelish xavfini tug‘dirishi aytildi.

«Eron va Isroil o‘rtasida o‘t ochishni to‘xtatish bo‘yicha erishilgan kelishuvni qo‘llab-quvvatlaymiz. Ushbu qarorni mintaqadagi keskinlikni yumshatish, xavfsizlikni tiklash yo‘lidagi muhim qadam sifatida baholaymiz», — dedi O‘zbekiston yetakchisi.

Prezident ushbu sammit Iqtisodiy hamkorlik tashkiloti doirasidagi ko‘p qirrali amaliy hamkorlikka kuchli sur’at bag‘ishlashi va yangi bosqichni boshlab berishiga ishonch bildirdi.