Maktab bitiruvchilari shahodatnomani 20 iyundan yuklab olishi mumkin

Maktab bitiruvchilari shahodatnomani 20 iyundan boshlab, e-shahodatnoma.uz axborot tizimi orqali onlayn tarzda yuklab olishi mumkin. Bu haqda Maktabgacha va maktab ta’limi vazirligi xabar berdi.

Qayd qilinishicha, 11-sinf maktab bitiruvchilarining shahodatnoma ma’lumotlari Bilim va malakalarni baholash agentligining oliy ta’lim muassasalariga qabul bo‘yicha elektron platformasiga integratsiya qilingan.

Shu bois, oliy ta’lim muassasalariga elektron hujjat topshirish jarayonida bitiruvchining shahodatnoma ma’lumotlari avtomatik tarzda taqdim etiladi. Bitiruvchilar shahodatnomani shaxsan taqdim etishiga ehtiyoj yo‘q.

e-shahodatnoma.uz elektron platformasiga quyidagi umumiy o‘rta ta’lim maktablari 11-sinf bitiruvchilarining shahodatnoma ma’lumotlari kiritilgan:

- Maktabgacha va maktab ta’limi vazirligi tizimidagi umumiy o‘rta ta’lim maktablari;

- Ixtisoslashtirilgan ta’lim muassasalari agentligi tasarrufidagi Prezident maktablari, ijod maktablari va ixtisoslashtirilgan maktablar;

- Yoshlar siyosati va sport vazirligi tasarrufidagi olimpiya va paralimpiya sport turlariga tayyorlash markazlari;

- Nodavlat ta’lim tashkilotlarining 11-sinf bitiruvchilari.

Akademik litsey va kasb-hunar maktablari bitiruvchilarining diplom ma’lumotlari Oliy ta’lim, fan va innovatsiyalar vazirligining elektron tizimiga kiritiladi.

Ma’lumot o‘rnida, joriy o‘quv yilida umumta’lim maktablarini 390 mingdan ortiq bitiruvchilar tamomlaydi.