O‘zbekiston va Turkiya milliy jamoalari ilk marta o‘rtoqlik uchrashuvi o‘tkazadi

O‘zbekiston milliy jamoasi 2 iyunda Turkiya milliy jamoasiga qarshi o‘rtoqlik o‘yini o‘tkazadi. O‘FA rasmiy saytiga ko‘ra, uchrashuv Antaliyada bo‘lib o‘tishi belgilangan.

Qayd etish kerak, mazkur bellashuv O‘zbekiston va Turkiya milliy jamoalari o‘rtasidagi dastlabki o‘yin bo‘ladi. Ushbu jamoalar 2013 yilda ham o‘rtoqlik uchrashuvi o‘tkazishi kelishilgan, ammo o‘shanda Turkiya tomoni 14 avgust kuni Toshkentda o‘tishi belgilangan uchrashuvni bekor qilib, bunga haddan tashqari issiq ob-havo sharoiti va O‘FF (hozirda O‘FA) kerakli sharoitlarni yaratib bermaganini sabab sifatida keltirgandi.

Hozircha bu yil 2 iyunda Antaliyada bo‘ladigan o‘yin haqida TFF rasmiy saytida ma'lum qilinganicha yo‘q.

Ma'lumot uchun, Turkiya hozirda FIFA reytingida 39-pog‘onani egallab turibdi. 1 iyundan e'tiboran Shenol Gyunesh jamoa bosh murabbiyi lavozimini egallaydi. Ushbu mahalliy mutaxassis 2000-2004 yillarda ham Turkiya termasiga ustozlik qilgan, uning qo‘l ostida jamoa JCh-2002da uchinchi o‘rinni olgan.

Gyunesh ixtiyorida Angliyaning «Everton», «Lester», Italiyaning «Milan», «Sassuolo», Fransiyaning «Lill», Germaniyaning «Shtutgart», Ispaniyaning «Selta» kabi klublarida to‘p suruvchi futbolchilar bor.

Ta'kidlash joiz, O‘zbekiston bunga qadar UYeFAga a'zo 13ta mamlakat termasiga qarshi (ularning barchasi - Sharqiy Yevropa jamoalari) o‘yin o‘tkazgan.

Avvalroq Ektor Kuper jamoasi 7 va 11 iyun kunlari Toshkentda KXDR va Suriya milliy termalariga qarshi maydonga tushishi ma'lum bo‘lgandi.